దివ్యాంగులకు మరింత ఆసరా

మెదక్‌, న్యూస్‌టుడే: దివ్యాంగుల్లో మరింత భరోసా నింపుతూ ప్రభుత్వం శుభవార్తను అందించింది. వారి పింఛను మరో రూ.వేయి పెంచనున్నట్లు సీఎం కేసీఆర్‌ మంచిర్యాల జిల్లాలో ఏర్పాటు చేసిన సభలో ప్రకటించారు. దీంతో ఎంతోమందికి మేలు చేకూరనుంది. ప్రభుత్వం ఆసరా పథకం ద్వారా దివ్యాంగులకు నెలకు ప్రస్తుతం రూ.3,016, ఇతర విభాగాల వారికి రూ.2,016 పింఛన్‌ అందజేస్తోంది. గత ఆగస్టులో పింఛన్‌ అర్హత వయసును 65 ఏళ్ల నుంచి 57 ఏళ్లకు కుదించడంతో మరింత మంది లబ్ధిదారులకు సాయం అందుతోంది. ఈ క్రమంలో ప్రభుత్వం ప్రస్తుతం దివ్యాంగులకు ఇస్తున్న సాయాన్ని మరింత పెంచింది. వచ్చే నెల నుంచి రూ.4,116 చెల్లిస్తామని స్పష్టం చేయడంతో దివ్యాంగుల్లో హర్షాతిరేకాలు వ్యక్తమవుతున్నాయి. తెలంగాణ రాష్ట్ర అవతరణ దశాబ్ది ఉత్సవాల్లో భాగంగా సంక్షేమ సంబురాల్లో తీపి కబురు అందించినట్లయింది. తాజా నిర్ణయంతో జిల్లాలోని 8,615 మంది లబ్ధి పొందనున్నారు. ప్రస్తుతం జిల్లాలోని దివ్యాంగులు మొత్తంగా రూ.2.59 కోట్లకు పైగా లబ్ధి పొందుతున్నారు. పెరగనున్న సొమ్ముతో ఆ మొత్తం రూ.3.54 కోట్లకు చేరనుంది.