జిల్లా పోలీసు శాఖలో కరోనా కలకలం

సూర్యాపేట నేరవిభాగం, న్యూస్‌టుడే: సూర్యాపేట జిల్లా పోలీసులను కరోనా మహమ్మారి చుక్కలు చూపుతోంది. ఎస్పీ రాజేంద్రప్రసాద్‌ సైతం కొద్దిరోజులుగా స్వీయ గృహ నిర్బంధంలో ఉండి బుధవారం పరీక్ష చేయించుకోగా నెగిటివ్‌ వచ్చింది. ఇప్పటికే సూర్యాపేట, కోదాడ డీఎస్పీలు మోహన్‌కుమార్‌, రఘు వైరస్‌ బారిన పడి తిరిగి కోలుకున్నారు. ప్రస్తుతం జిల్లాలో మొత్తం 70 మంది పోలీసులకు పాజిటివ్‌ సోకింది. ఇందులో ముగ్గురు ఎస్సైలు, 15 మంది ఏఆర్‌ కానిస్టేబుళ్లు, మిగిలిన వారు సివిల్‌ పోలీసులు ఉన్నారు. వారం రోజులుగా పోలీసు శాఖలో కరోనా వైరస్‌ వేగంగా విస్తరిస్తోంది. కొవిడ్‌ బారిన పడినవారంతా స్వీయ గృహ నిర్బంధంలో ఉన్నారు.