అంధుల పాఠశాలతో కళాతపస్వికి అనుబంధం

నల్గొండలోని అంధుల పాఠశాల వెబ్‌సైట్‌ను 2006లో ప్రారంభిస్తున్న కళా తపస్వి విశ్వనాథ్‌

నల్గొండ సంక్షేమం, న్యూస్‌టుడే: భారతీయ శాస్త్రీయ సంగీత, నాట్యాల గొప్పతనాన్ని తన సినిమాల ద్వారా ప్రపంచానికి చాటిచెప్పిన ప్రఖ్యాత దర్శకుడు, కళా తపస్వి డా.కె.విశ్వనాథ్‌కు నల్గొండలోని అంధుల పాఠశాలతో అనుబంధం ఉంది. జిల్లా కేంద్రంలో డెవలప్‌మెంట్‌ అండ్‌ వెల్ఫేర్‌ అసోసియేషన్‌ ఆఫ్‌ ది బ్లైండ్‌(డ్వాబ్‌) ఆధ్వర్యంలో నిర్వహిస్తున్న నల్గొండ అంధుల పాఠశాల కార్యకలాపాలు ప్రపంచ వ్యాప్తంగా తెలియాలన్న ఉద్ధేశంతో 2006లో ఆ సంస్థ వెబ్‌సైట్‌ www.helpblind.org ను హైదరాబాద్‌లో ఆయన ప్రారంభించారు. వెబ్‌సైట్‌ రూపొందించడానికి అయిన ఖర్చు రూ.10 వేలు అప్పట్లో ఆయనే అందచేశారు. విశ్వనాథ్‌ మృతికి సంతాపంగా నల్గొండలోని అంధుల పాఠశాలలో శుక్రవారం సంతాప సభ నిర్వహించారు. కళా తపస్వి విశ్వనాథ్‌తో ఉన్న అనుబంధాన్ని, జ్ఞాపకాలను, ఆనాటి స్మృతులను డ్వాబ్‌ ప్రధాన కార్యదర్శి పొనుగోటి చొక్కారావు గుర్తు చేశారు.

యాదగిరీశుడి క్షేత్రం మహిమాన్వితం..

యాదగిరిగుట్ట, న్యూస్‌టుడే: స్వయంభూ క్షేత్రమైన యాదగిరీశుడి సన్నిధి ఎంతో మహిమాన్వితమైందని, నమ్మిన భక్తులకు అభయమిచ్చే దేవుడనీ కళాతపస్వి ప్రముఖ సినీ దర్శకుడు కె.విశ్వనాథ్‌ చెప్పిన మాటలు ఇవి. 2006లో సినీ దర్శకుడు విశ్వనాథ్‌ దంపతులు ఈ క్షేత్రాన్ని సందర్శించి వ్యక్తపరిచిన మాటల్ని అప్పటి ఆలయోద్యోగులు గుర్తుకు తెచ్చుకొని దివంగతులైన కళాతపస్వికి నివాళి అర్పించారు. అప్పట్లో సతీసమేతంగా వచ్చిన ఆయన ఈ క్షేత్రంలో కొనసాగుతున్న నిత్యాన్న ప్రసాదం పథకానికి వారిద్దరి పేరిట విరాళం సమర్పించారు. వీలైతే యాదగిరి ఆలయ చరిత్రకు చెందిన సినిమా తీస్తానని చెప్పిన మాటను పలువురు గుర్తుచేశారు.