Nellore: వైకాపాలో మరో అసంతృప్తి గళం.. పరిశీలకుడిపై నిప్పులు చెరిగిన ఎమ్మెల్యే

నెల్లూరు: నెల్లూరు జిల్లాలో అధికార పార్టీపై మరో వైకాపా ఎమ్మెల్యే అసంతృప్తి వ్యక్తం చేశారు. తన నియోజకవర్గంలో పరిశీలకుడి ఏర్పాటుపై ఉదయగిరి ఎమ్మెల్యే మేకపాటి చంద్రశేఖర్‌రెడ్డి మండిపడ్డారు. ఎమ్మెల్యేకు ప్రభుత్వానికి మధ్య పరిశీలకుడు వారధిగా ఉండాలన్న ఆయన.. తన నియోజకవర్గంలో ధనుంజయరెడ్డి అనే పరిశీలకుడు చిచ్చుపెడుతున్నారని ధ్వజమెత్తారు. వరికుంటపాడు మండలం తూర్పు రొంపిదొడ్లలో గడప గడపకు మన ప్రభుత్వం కార్యక్రమంలో పాల్గొన్న ఆయన.. ధనుంజయరెడ్డి తీరుపై నిప్పులు చెరిగారు. తనను ధనుంజయరెడ్డి ఇబ్బంది పెడుతున్నారంటూ ముఖ్యమంత్రికి ఫిర్యాదు చేయనున్నట్టు చెప్పారు. పరిశీలకుడి నిర్ణయాల వల్ల పార్టీకి చెడ్డపేరు వస్తుందన్నారు. ధనుంజయరెడ్డి వైకాపా కాదని, తెలుగుదేశం వ్యక్తి అని ఆరోపించారు. వైఎస్‌ కుటుంబానికి తాను విధేయుడినని.. తనపై పెత్తనం చేయడం కుదరదన్నారు. సీఎం జగన్‌, జిల్లా మంత్రి వద్ద తేల్చుకోవడమే కాదు.. దేనికైనా సిద్ధం అని మేకపాటి హెచ్చరించారు.