మద్యం అమ్మకాలపై మహిళల ఆగ్రహం

భిక్కనూరు, న్యూస్‌టుడే: అక్రమ మద్యం అమ్మకాలపై పెద్దమల్లారెడ్డి గ్రామ మహిళలు మరోసారి ఆగ్రహం వ్యక్తం చేశారు. మంగళవారం సాయంత్రం ఓ వ్యక్తి 40 మద్యం సీసాలను దొంగచాటుగా తీసుకొచ్చి విక్రయిస్తుండగా గ్రామస్థులు పట్టుకున్నారు. పెద్దసంఖ్యలో చేరుకున్న మహిళలు, యువకులు అమ్మకందారుణ్ని నిలదీశారు. పట్టుబట్టి అతనితోనే సీసాలను ధ్వంసం చేయించారు. సంఘటనా స్థలానికి పోలీసులు చేరుకొని విచారించారు. పోలీసులు, ఆబ్కారీ అధికారులు మద్యం అమ్ముతున్న వారిని పట్టుకోవాల్సింది పోయి పట్టుకున్న తమపైనే కేసులు పెడతామని బెదిరిస్తున్నారని గ్రామస్థులు ఆరోపించారు. ఎన్ని కేసులు పెట్టినా గ్రామంలో మద్యం అమ్మితే ఇలాగే తిరగబడతామని హెచ్చరించారు.