చిట్‌ పేరిట రూ. 2 కోట్లకుపైగా టోకరా

పోలీస్‌ స్టేషన్లో తృప్తిరాణి

రాయగడ పట్టణం, న్యూస్‌టుడే: చిట్‌ఫండ్‌ పేరిట ఓ మహిళ రూ.2 కోట్లకుపైగా టోకరా వేసిన ఉదంతం జిల్లా కేంద్రంలో చోటు చేసుకుంది. బుధవారం నిందితురాలితోపాటు ఆమె సోదరుడిని పోలీసులు అదుపులోకి తీసుకున్నారు. వివరాల్లోకి వెళితే.. స్థానిక రింగురోడ్డు, సమీపంలో తృప్తిరాణి ఖొరొ అనే మహిళ గత కొంత కాలంగా చిట్‌ఫండ్‌ పేరిట పలువురు మహిళల నుంచి డబ్బులు వసూలు చేసింది. నాలుగు రోజుల కిందట ఇంటిని ఖాళీ చేసి కుటుంబ సభ్యులతో కలిసి పరారైంది. బాధితులు పోలీసులను ఆశ్రయించారు. దర్యాప్తు ప్రారంభించిన పోలీసులు తృప్తిరాణి, ఆమె సోదరుడిని అదుపులోకి తీసుకొని విచారిస్తున్నారు. విషయం తెలుసుకున్న బాధిత మహిళలు పోలీస్‌స్టేషన్‌కు చేరుకొని తమ గోడు విన్నవించుకున్నారు. భాజపా మహిళా మోర్చా జిల్లా అధ్యక్షురాలు బురిడి లక్ష్మీ ఠాణాకు చేరుకొని బాధితులకు అండగా నిలిచారు. న్యాయం జరిగేలా చూడాలని పోలీసులను కోరారు. దీనిపై పోలీసులు ఎలాంటి వివరాలు వెల్లడించడం లేదు.