ప్రజల గుండెచప్పుడు బిజుబాబు: నవీన్‌

భువనేశ్వర్‌, న్యూస్‌టుడే: బిజుబాబు భౌతికంగా లేకపోయినా, రాష్ట్ర ప్రజల గుండె చప్పుడుగా అందరి హృదయాల్లో ఉన్నారని ముఖ్యమంత్రి నవీన్‌ పట్నాయక్‌ అన్నారు. బుధవారం బిజు వర్ధంతిని పురస్కరించుకుని, భువనేశ్వర్‌లో ఆ మహానీయుని ఘాట్‌ వద్ద బిజద నేతలు, అభిమానులు నివాళులు అర్పించారు. పాల్గొన్న నవీన్‌ తన తండ్రి విగ్రహానికి పుష్ఫగుచ్ఛాలు సమర్పించి అంజలి ఘటించారు. ఈ సందర్భంగా ఆయన మాట్లాడుతూ.. దేశానికి, రాష్ట్రానికి బిజుబాబు చేసిన సేవలను ప్రస్తుతించారు. ఆ మహానీయుని ఆశలు, ఆకాంక్షలు నెరవేర్చడానికి అంతా కలసి రావాలని పిలుపునిచ్చారు. మరోవైపు శంఖభవన్‌ (బిజద కార్యాలయం)లోనూ బిజు వర్ధంతి కార్యక్రమం నిర్వహించారు. పార్టీ నాయకులంతా పాల్గొని మాట్లాడారు. రక్తదాన శిబిరం ఏర్పాటైంది. రాష్ట్రవ్యాప్తంగా బిజు వర్ధంతిని పురస్కరించుకొని నేతలు, కార్యకర్తలు సేవా కార్యక్రమాలు చేపట్టారు.