గృహ నిర్మాణాల్లో అక్రమాలపై విచారణకు ఆదేశం

పూర్తి వివరాలతో నివేదిక కోరిన కలెక్టర్‌

నెల్లూరు(బృందావనం), న్యూస్‌టుడే: గృహ నిర్మాణాల్లో అక్రమాలపై కలెక్టర్‌ కేవీఎన్‌ చక్రధర్‌బాబు శుక్రవారం విచారణకు ఆదేశించారు. సున్న‘మేశారు’, జగనన్న కాలనీలో జలగలు, ఉచిత ఇసుకనూ వదల్లేదు! శీర్షికలతో ‘ఈనాడు’లో గత మూడు రోజులుగా ప్రచురితమైన కథనాలపై ఆయన స్పందించారు. మొత్తం వ్యవహారాలపై పూర్తి వివరాలతో నివేదిక అందించాలని జిల్లా గృహ నిర్మాణసంస్థ పీడీ నాగరాజుకు సూచించారు. జిల్లా వ్యాప్తంగా జగనన్న కాలనీల్లోని లేఅవుట్లలో వేల సంఖ్యలో ఇళ్ల నిర్మాణాలు చేపట్టకుండానే బిల్లులు చేసుకోవడం.. 20వేల ఇళ్లను పూర్తి చేయాలని గుత్తేదారులకు అప్పగిస్తే.. ఇంత వరకు ఒక్కటీ పూర్తి కాకపోవడం..  గతంలో పూర్తయిన ఇళ్ల పేరుతో ఉచిత ఇసుకనూ పక్కదారి పట్టించడం వంటి అంశాలపై కథనాలు ప్రచురితమైన విషయం తెలిసిందే. దీంతో మొత్తం వ్యవహారాన్ని తీవ్రంగా పరిగణించిన కలెక్టర్‌- సమగ్ర విచారణకు ఆదేశించారు. ఈ సందర్భంగా గృహ నిర్మాణ సంస్థ పీడీ నాగరాజు మాట్లాడుతూ.. ఇళ్ల నిర్మాణాలు పూర్తి చేయని గుత్తేదారులకు నోటీసులు జారీ చేయాలని కలెక్టర్‌ ఆదేశించారన్నారు. ఆ మేరకు చర్యలు తీసుకుంటామని వివరించారు.