కొండపి వైకాపాలో గూండాగిరి

అసమర్థులకు సీటిస్తే ఓటమే
బహిష్కరించాలని నివేదిస్తాం: జూపూడి

సంఘీభావ సమావేశంలో మాట్లాడుతున్న జూపూడి ప్రభాకర్‌

సింగరాయకొండ గ్రామీణం, న్యూస్‌టుడే: ‘కొండపి నియోజకవర్గ వైకాపాలో కొందరు గూండాగిరికి పాల్పడుతున్నారు. హత్యా రాజకీయాలను ప్రోత్సహిస్తున్నారు. అటువంటి వారిని పార్టీ నుంచి బహిష్కరించాలని అధిష్ఠానాన్ని కోరతాం’ అని రాష్ట్ర ప్రభుత్వ సామాజిక న్యాయ సలహాదారు జూపూడి ప్రభాకర్‌ అన్నారు. సంఘీభావ సదస్సు పేరుతో వైకాపా నియోజకవర్గ స్థాయి నాయకులతో సింగరాయకొండలో ఆయన గురువారం సమావేశం నిర్వహించారు. ఈ సందర్భంగా జూపూడి మాట్లాడుతూ.. పార్టీ ఆవిర్భావం నుంచి సేవ చేసే వారిపై దాడికి పాల్పడినవారిని, అందుకు ప్రోత్సహించిన వారిపై కఠిన చర్యలు తీసుకోవాలన్నారు. టంగుటూరులో ఒక మహిళా నాయకురాలి ఇంటిపై దాడి చేయడం, మూడు రోజుల క్రితం వైకాపా రాష్ట్ర వైద్య విభాగం అధ్యక్షుడు అశోక్‌కుమార్‌రెడ్డి హత్యకు కుట్ర పన్నడం వంటి చర్యలు పార్టీకి వెన్నుపోటు పొడవడమే అన్నారు. నియోజకవర్గంలో అసమర్థుడికి సీటిస్తే వైకాపాకు ఓటమి తప్పదన్నారు. పీడీసీసీ బ్యాంకు ఛైర్మన్‌ మాదాసి వెంకయ్య మాట్లాడుతూ.. అశోక్‌ కుమార్‌ రెడ్డిపై దాడికి పాల్పడినవారు, వెనుకున్న కుట్రదారులపై చర్యలు తీసుకోవాలని కోరుతూ ఇప్పటికే ఎస్పీకి ఫిర్యాదు చేసినట్టు చెప్పారు. కార్యక్రమంలో వైకాపా వైద్యవిభాగం రాష్ట్ర అధ్యక్షుడు డా.అశోక్‌కుమార్‌రెడ్డి, మర్రిపూడి, టంగుటూరు, సింగరాయకొండ మండల అధ్యక్షులు రమణారెడ్డి, హరిబాబు, రామ్మూర్తి, పొన్నలూరు, సింగరాయకొండ ఎంపీపీలు మాధవ, శోభారాణి, కొండపి ఏఎంసీ ఉపాధ్యక్షుడు రంగారెడ్డి, మాజీ ఛైర్మన్‌ ప్రభావతి, ఆరు మండలాల ముఖ్య నాయకులు పాల్గొన్నారు.