కుక్కల దాడిలో చుక్కలదుప్పి మృతి

చుక్కల దుప్పికి వైద్య సేవలందిస్తున్నఅటవీశాఖ సిబ్బంది, స్థానిక యువకులు

పాతపట్నం, న్యూస్‌టుడే: పాతపట్నం మండలం సూర్యనారాయణపురంలో వీధి కుక్కల దాడిలో గురువారం ఉదయం ఓ చుక్కల దుప్పి మృతిచెందగా, మరొకటి గాయపడింది. అటవీశాఖ ఎఫ్‌.ఎస్‌.ఒ. యశస్వి తెలిపిన వివరాల ప్రకారం.. అంతరాబ అటవీ ప్రాంతం నుంచి రెండు దుప్పిలు గురువారం వేకువ జామున సూర్యనారాయణపురం గ్రామానికి వచ్చాయి. వీధి కుక్కల దాడిలో ఒకటి మృతిచెందగా గాయపడిన మరొకదాన్ని స్థానికులు గుర్తించి వాటి బారి నుంచి సంరక్షించారు. అటవీశాఖ అధికారులకు సమాచారం అందించడంతో ఎఫ్‌.బి.ఒ. లక్ష్మీనారాయణ అక్కడికి వచ్చి గాయపడిన దానికి వైద్య సేవలందించి, స్థానిక యువత సహకారంతో అటవీ ప్రాంతంలో విడిచిపెట్టారు. మృతిచెందిన దానికి పోస్టుమార్టం నిర్వహించి, దహనపరిచినట్లు ఆయన తెలిపారు.