మలుపులు.. మృత్యులోగిళ్లు

ఏళ్ల తరబడి ఇదే పరిస్థితి అన్న వాహనదారులు
ప్రభుత్వం ఎలాంటి చర్యలు తీసుకోలేదని అసహనం
చాలా ప్రమాదాలు జరిగాయని వెల్లడి
కవిటి గ్రామీణం, కంచిలి గ్రామీణం  

పలు గ్రామాల్లోని మలుపుల వద్ద ఎలాంటి హెచ్చరిక బోర్డులు లేకపోవడంతో ప్రమాదాలు నిత్యకృత్యమైపోయాయి. ఆయా ఘటనల్లో మృతులు, గాయాల పాలైన వారూ ఉన్నారు. ప్రమాద నివారణకు ప్రభుత్వం చర్యలు తీసుకోకపోవడంతో ఆ రోడ్లపై రాకపోకలు చేసే వాహనదారుల్లో ఆందోళన తప్పడం లేదు.

కవిటి మండలంలోని రాజపురం నుంచి బైరిపురం మీదుగా జల్లుపుట్టుగ వచ్చే రహదారిలో మలుపులు ప్రమాదాలకు చిరునామాగా మారాయి.  ‘యూ’, ‘ఎస్‌’ ఆకారాల్లో ఉండటంతో దగ్గరకు వచ్చే వరకు ఎదురుగా వస్తున్న వాహనాలు కనిపించడం లేదు. దీంతో ప్రమాదాలు సంభవిస్తున్నాయి.

ఆ రోడ్లపై పరీక్షే

సీమూరు నుంచి నెలవంక, బైరెడ్లపుట్టుగ, కొమ్ముపుట్టుగ, కపాసుకుద్ది, ముత్యాలపేట వయా మండల కేంద్రం కవిటి చేరుకునే రహదారిల్లోనూ ఇదే పరిస్థితి నెలకొంది. కవిటి నుంచి రాజపురం, బొరివంక నుంచి డి.గొనపపుట్టుగ, నర్తుపుట్టుగ నుంచి జాతీయ రహదారికి చేరుకునే క్రమంలో పలు గ్రామాల్లో మలుపులు వాహనదారులను భయపెడుతున్నాయి. హెచ్చరిక బోర్డులు, వేగ నియంత్రికలు సంబంధిత శాఖాధికారులు ఏర్పాటు చేయలేదు. చీకటి పడితే మలుపుల వద్ద హడలిపోతున్నారు. ప్రమాద నివారణ చర్యలు తీసుకోవాలని ఆయా గ్రామస్థులు, వాహనదారులు కోరుతున్నారు.

మొక్కలు తొలగించక ఇక్కట్లు

ఆదివారం సంత నుంచి కవిటి రోడ్డును కలిపే రహదారిలో ఏళ్లపాటు జంగిల్‌ క్లియరెన్స్‌ లేకపోవడంతో ఇరువైపులా పొదలు పెరిగి వాహనాలు కనిపించడం లేదు. కంచిలి, కవిటి మండలాలను కలిపే ప్రధాన రహదారి కావడంతో నిత్యం రద్దీగా ఉంటోంది.

భయంగా ఉంటుంది

- పి.రామారావు, డీజి.పుట్టుగ

జల్లుపుట్టుగ నుంచి రాజపురం వెళ్లే రహదారిలో పలు చోట్ల మలుపులు ఉన్నాయి. అక్కడకు వచ్చేసరికి జాగ్రత్త పడకపోతే ప్రమాదమే. ఎదురుగా వచ్చే వాహనాలు కనిపించవు. అధికారులు చర్యలు తీసుకోవడం లేదు.

వేగ నియంత్రికలు లేవు

- ఎస్‌.గణేష్‌, యువకుడు, నెలవంక

కవిటి నుంచి నెలవంక దారిలో మలుపుల వద్ద ఎలాంటి హెచ్చరిక బోర్డులు, వేగ నియంత్రికలు లేవు. చీకట్లో వాహనాలపై వెళ్లినప్పుడు ఆందోళనగా ఉంటుంది.