పీహెచ్‌సీలకు కేంద్ర బృందాల రాక!

అక్కులపేట పీహెచ్‌సీలో దస్త్రాలు పరిశీలిస్తున్న డీఎంహెచ్‌వో మీనాక్షి

ఆమదాలవలస గ్రామీణం, న్యూస్‌టుడే: జిల్లాలో ప్రాథమిక ఆరోగ్య కేంద్రాల పరిశీలనకు కేంద్ర బృందాలు వస్తున్నాయని.. అధికారులు, సిబ్బంది అప్రమత్తంగా ఉండాలని జిల్లా వైద్య ఆరోగ్య శాఖాధికారిణి డాక్టర్‌ బొడ్డేపల్లి మీనాక్షి అన్నారు. ఆమదాలవలస మండలం అక్కులపేటలోని ప్రాథమిక ఆరోగ్య కేంద్రాన్ని గురువారం ఆమె సందర్శించారు. ఈ సందర్భంగా డీఎంహెచ్‌వో మాట్లాడుతూ రికార్డులు సక్రమంగా ఉంచాలని సూచించారు. ఆరోగ్య కేంద్ర పరిసరాలు పరిశుభ్రంగా ఉంచాలని ఆదేశించారు. గతంలో ఈ కేంద్రానికి జిల్లా, రాష్ట్ర స్థాయి పురస్కారాలు వచ్చాయని, మరోసారి వచ్చేలా కృషి చేయాలని కోరారు. ఆరోగ్య కేంద్రంలో నెలకొన్న సమస్యలను అధికారులు ఆమె దృష్టికి తీసుకెళ్లగా పరిష్కారానికి చర్యలు తీసుకుంటామన్నారు. ఆమె వెంట సీసీ నారాయణరావు, వైద్యాధికారులు మీనాకుమారి, వసంత తదితరులు ఉన్నారు.