నామినేషన్‌ దాఖలు చేసిన అన్నామలై

పార్టీ వర్గీయులతో కలిసి నామినేషన్‌ దాఖలు చేస్తున్న అన్నామలై

కోయంబత్తూర్‌, న్యూస్‌టుడే: భాజపా తరపున కోయంబత్తూర్‌ లోక్‌సభ నియోజకవర్గం నుంచి పోటీ చేస్తున్న ఆ పార్టీ రాష్ట్ర అధ్యక్షుడు అన్నామలై బుధవారం నామినేషన్‌ దాఖలు చేశారు. జిల్లా కలెక్టరు కార్యాలయానికి పార్టీ వర్గీయులతో చేరుకున్న ఆయన ఎన్నికల రిటర్నింగ్‌ అధికారి క్రాంతికుమార్‌కు నామినేషన్‌ పత్రం అందించారు. అనంతరం విలేకర్లతో మాట్లాడుతూ భాజపాకు ప్రజల మద్దతు అధికంగా ఉందన్నారు. అంత్యంత మెజార్టీ ఓట్లతో ఘన విజయం సాధిస్తామని చెప్పారు. ప్రధాని నరేంద్రమోదీ మరోసారి అధికారం చేపడతారని విశ్వాసం వ్యక్తం చేశారు. కోయంబత్తూరు నుంచి తాను విజయం సాధించి నియోజకవర్గ సమస్యలను లోక్‌సభలో చర్చిస్తానన్నారు.