రోడ్డుప్రమాదంలో ఆప్ఘనిస్తాన్‌ విద్యార్థి మృతి

పెదవాల్తేరు, న్యూస్‌టుడే: రోడ్డు ప్రమాదంలో విదేశీ విద్యార్థి మృతిచెందాడు. దీనికి సంబంధించి ఎంవీపీ స్టేషన్‌ పోలీసులు అందించిన వివరాలు ఇలా ఉన్నాయి. డాక్టర్‌ వి.ఎస్‌.కృష్ణా కళాశాల దరి ఎలియంట్‌ మేనేజ్‌మెంటు కళాశాలలో ఆప్ఘనిస్తాన్‌కు చెందిన హబీబుల్లా హుస్సేన్‌ (24) ఎం.బి.ఎ. మూడో ఏడాది చదువుతూ జోడుగుళ్లపాలెంలో నివాసముంటున్నాడు. గురువారం రాత్రి లాసన్స్‌బేకాలనీలో ఉంటున్న తన స్నేహితుని వద్దకు బైకుపై వస్తుండగా లుంబినీపార్కు వద్ద బైకు అదుపుతప్పడంతో తలకు తీవ్రగాయాలయ్యాయి. పోలీసులు వైద్యం కోసం ఆసుపత్రికి తరలించగా.. చికిత్స పొందుతూ శుక్రవారం ఉదయం మృతిచెందాడు. ప్రస్తుతానికి బైకు అదుపుతప్పి పడిపోయినట్లు భావిస్తున్నా.. ఆ సమయంలో వర్షం పడుతుండటంతో సంఘటన స్థలంలో చెట్టు పడి ఉంది. ఒకవేళ చెట్టు ఇతని మీద పడి ఉంటుందా? అనేది కూడా పోలీసులు పరిశీలిస్తున్నారు. సి.ఐ. పి.రమణయ్య ఆధ్వర్యంలో ఎస్సై భాస్కరరావు కేసు నమోదు చేసి దర్యాప్తు చేస్తున్నారు.