సిరిజాంలో గిరినాగు అలజడి

గిరినాగును పట్టుకున్న వెంకటేశ్‌

చీడికాడ, న్యూస్‌టుడే: అనకాపల్లి జిల్లా చీడికాడ మండలం సిరిజాంలో గురువారం రాత్రి అత్యంత విషపూరితమైన భారీ గిరినాగు (కింగ్‌కోబ్రా) అలజడి సృష్టించింది. ఈ గ్రామంలోని గండినాయుడు ఇంటి వద్ద ఈ పామును చూసిన జనం భయంతో వణికిపోయి పరుగులు తీశారు. దీనిపై అటవీగార్డు శివకుమార్‌కు సమాచారం అందించారు. స్పందించిన ఆయన మాడుగుల వణ్యప్రాణి సంరక్షణ ప్రతినిధి వెంకటేశ్‌ను అప్రమత్తం చేశారు. వెంకటేశ్‌ ఇక్కడికి చేరుకుని గిరినాగును సజీవంగా పట్టుకుని ఓ సంచిలో బంధించారు. ఈ పామును కోనాం సమీపంలోని అటవీ ప్రాంతంలో విడిచిపెట్టారు. ఈ సందర్భంగా వెంకటేశ్‌ ‘న్యూస్‌టుడే’తో మాట్లాడుతూ.. గిరినాగు దాదాపుగా 12 అడుగులకుపైగా, బరువు ఎనిమిది కేజీలు ఉన్నట్లు తెలిపారు. వీటిని పర్యావరణ సమతుల్యత కోసం సంరక్షించుకోవాలన్నారు.