చూసొద్దామా కనకమహాలక్ష్మి జాతర

నేటి అర్ధరాత్రి అమ్మవారికి పూజలు ప్రారంభం

ఆలయ ప్రాంగణంలో ఏర్పాట్లు

చీపురుపల్లి, న్యూస్‌టుడే: ఉత్తరాంధ్రుల ఆరాధ్య దైవం.. చీపురుపల్లి కనకమహాలక్ష్మి అమ్మవారి 24వ జాతర మహోత్సవాలు 6 నుంచి 8 వరకు వైభవంగా నిర్వహించనున్నారు. ఆదివారం వేకువజామున రెండు గంటలకు ఆలయ కమిటీ ఆధ్వర్యంలో అమ్మవారికి మొదటి పూజ జరగనుంది. ఆ తర్వాత దర్శనాలు మొదలవుతాయి. ఇప్పటికే ఇతర ప్రాంతాల్లో స్థిరపడిన వారంతా కుటుంబ సభ్యులతో ఇళ్లకు చేరుకోవడంతో పట్టణ వీధుల్లో సందడి నెలకొంది. మూడు రోజులు సాయంత్రం 5 నుంచి అర్ధరాత్రి వరకు జాతర తిలకించడానికి భక్తజనం పోటెత్తుతారు. అమ్మవారి దర్శనానికి వెళ్లే భక్తుల కోసం రూ.100, రూ.30, రూ.20, రూ.10 టిక్కెట్లు పెట్టి క్యూలైన్లు ఏర్పాటు చేశారు. భక్తులకు ఇబ్బంది లేకుండా ఆలయ ప్రాంగణంలో టెంట్లు వేశారు. జాతరలో భాగంగా మూడు రోజులు సాయంత్రం 5 గంటల నుంచి తెల్లవారుజాము వరకు భారీగా సాంస్కృతిక కార్యక్రమాలు నిర్వహించనున్నారు. రెండు వైద్య శిబిరాలు ఏర్పాటు చేశారు. ఇద్దరు డీఎస్పీలు, ఏడుగురు సీఐలు, 30 మంది ఎస్‌ఐలు, 400 మంది పోలీస్‌ సిబ్బంది, రెండు ప్రత్యేక టాస్క్‌ఫోర్స్‌ బృందాల సభ్యులు ట్రాఫిక్‌ నియంత్రణతో పాటు బందోబస్తు నిర్వహించనున్నారు. జాతర ఏర్పాట్లను సంయుక్త కలెక్టర్‌ (ఆసరా) వెంకటరావు శుక్రవారం పరిశీలించారు.