చిన్నారికి సదరం ధ్రువపత్రం

వరంగల్‌ కలెక్టరేట్‌, న్యూస్‌టుడే: వరంగల్‌ కాశీబుగ్గ ఎస్సార్‌ నగర్‌కు చెందిన చిన్నారి ఏంజిల్‌కు ఎట్టకేలకు సదరం ధ్రువపత్రం అందింది. పుట్టుకతోనే.. చెవిటి, మూగ, వెన్ను సంబంధిత వ్యాధులతో బాధపడుతున్న ఆ చిన్నారికి వికలాంగుల పింఛన్‌ ఇవ్వాలని కార్యాలయాల చుట్టూ తిరిగినా ఫలితం లేకుంది. గత నెల 23న నానమ్మ ఏంజిల్‌ను కలెక్టరేట్‌కు తీసుకొచ్చి తన మొర చెప్పుకుంది. ఈ అంశంపై మే 24న ‘చిన్నారికి పింఛన్‌ ఇయ్యరూ’ అంటూ ‘ఈనాడు’లో కథనం ప్రచురితమైంది. స్పందించిన అధికారులు త్వరితగతిన ఏంజిల్‌కు సదరం ధ్రువపత్రాన్ని అందజేశారు. త్వరలో చిన్నారికి పింఛన్‌ అందుతుందని డీఆర్డీవో పింఛన్‌ల విభాగం అధికారి పరమాత్మ ‘న్యూస్‌టుడే’కు తెలిపారు.