అదృశ్యం కేసుల్లో సమగ్ర విచారణ : ఎస్పీ

కడప నేరవార్తలు, న్యూస్‌టుడే : జిల్లాలో మహిళలు, బాలికల అదృశ్యం కేసుల్లో సమగ్ర విచారణ జరిపి సాధ్యమైనంత తొందరగా వారి ఆచూకీ గుర్తించాలని ఎస్పీ అన్బురాజన్‌ పోలీసు అధికారులను ఆదేశించారు. జిల్లాలో జరిగే అసాంఘిక కార్యకలాపాలపై నిరంతరం నిఘా ఉంచాలన్నారు. పెండింగ్‌ కేసులను త్వరితగతిన పరిష్కరించి బాధితులకు న్యాయం చేయాలన్నారు. మంగళవారం జిల్లా పోలీసు కార్యాలయంలోని పెన్నార్‌ సమావేశ మందిరంలో జరిగిన నేరాల సమీక్షలో ఎస్పీ మాట్లాడారు. పోక్సో, మహిళలపై జరిగిన నేరాల్లో నిర్ణీత సమయంలో ఛార్జ్‌షీటు దాఖలు చేయాలన్నారు. గంజాయి అక్రమ రవాణాపై నిఘా ఉంచి జిల్లా సరిహద్దులో అప్రమత్తంగా ఉండాలన్నారు.  సమావేశంలో ఏఎస్పీలు ప్రేరణకుమార్‌, నీలం పూజిత, ఏఆర్‌ అదనపు ఎస్పీ కృష్ణారావు, డీఎస్పీలు, సీఐలు, ఎస్సైలు పాల్గొన్నారు.