30 నుంచి కడపపైనే షర్మిల దృష్టి!

ఈనాడు, కడప: కడప ఎంపీ స్థానానికి నామినేషన్‌ దాఖలు చేసిన పీసీసీ అధ్యక్షురాలు వైఎస్‌ షర్మిల ఈ నెల 30వ తేదీ నుంచి తన సొంత నియోజకవర్గంపైనే ప్రత్యేక దృష్టి సారించనున్నారు. రాష్ట్రంలో ఎన్నికల ప్రచారం నిర్వహిస్తున్న ఆమె ఈ నెల 29 నాటికి పూర్తి చేసుకుని కడపకు రానున్నారు. అనంతరం పోలింగ్‌ పూర్తయ్యేవరకు కడప స్థానంపై దృష్టి పెట్టనున్నారని ఆమె సన్నిహిత వర్గాలు తెలిపాయి. కడప ఎంపీగా పోటీ చేయడంతోపాటు కుటుంబపరంగా నడుస్తున్న పోరుపై తలపడనున్నారు. వివేకా హత్యను వ్యతిరేకిస్తూ సోదరుడు జగన్‌, ఎంపీ అవినాష్‌రెడ్డి లక్ష్యంగా షర్మిలతో పాటు సునీత పోరాటం చేస్తున్నారు. సీబీఐ విచారణ నివేదిక ఆధారంగా చేసుకుని ప్రజాకోర్టులో తేల్చుకునే దిశగా పోరాటాన్ని మరింత ఉద్ధృతం చేసే దిశగా అడుగులు వేస్తూ రంగంలోకి దిగుతున్నారు. ఇద్దరు సోదరీ మణులు తాడోపేడో తేల్చుకునే దిశగా తలపడుతున్నారు. ప్రస్తుతం షర్మిలకు మద్దతుగా సునీత నియోజకవర్గంలో విస్తృతంగా ప్రచారం చేస్తున్నారు.