Crime News: భర్త హత్యకు రూ.10లక్షల సుపారీ

 రాజు దొడ్డబొమ్మన్నవర్‌ (పాతచిత్రం)

బెళగావి, న్యూస్‌టుడే : కుందానగరి బెళగావిలో తీవ్ర సంచలనాన్ని రేకెత్తించిన రియల్‌ ఎస్టేట్‌ వ్యాపారి రాజు దొడ్డబొమ్మన్నవర్‌ హత్య సంఘటన అనూహ్య మలుపు తిరిగింది. ఆయన రెండో భార్య, రియల్‌ ఎస్టేట్‌ వ్యాపారంలో ఇద్దరు భాగస్థులు హత్యకు పథకాన్ని రూపొందించారని, హంతకులకు రూ.పది లక్షల సుపారీ చెల్లించినట్లు పోలీసుల దర్యాప్తులో వెల్లడైంది. ఈ నేపథ్యంలో ఈ పథకాన్ని రూపొందించిన హతుడి రెండో భార్య కిరణ, భాగస్థులు ధర్మేంద్ర, శశికాంత్‌ను అరెస్టు చేసినట్లు పోలీసులు తెలిపారు. ఈనెల 15న ఉదయం రాజు దొడ్డబొమ్మన్నవర్‌ హత్యకు గురైన విషయం గుర్తుండే ఉంటుంది. ఉదయం మోటార్‌ సైకిల్‌పై వచ్చిన దుండగులు ఆయన ముఖంపై కారంపొడి చల్లి హత్య చేసి పరారయ్యారు.

రహదారి పక్కన పడి ఉన్న శవాన్ని వ్యాహ్యాళికి వచ్చిన కొందరు గుర్తించి పోలీసులకు సమాచారాన్ని అందించారు. దర్యాప్తు చేపట్టిన పోలీసులకు విస్తుపోయే నిజాలు వెలుగులోనికి వచ్చాయి. రాజు దొడ్డబొమ్మన్నవర్‌కు ముగ్గురు భార్యలు. వారికి వేర్వేరుగా ఇళ్లను నిర్మించారు. డబ్బు విషయంలో రెండో భార్య కిరణతో గొడవలొచ్చాయి. ఇదే అదనుగా వ్యాపారంలో భాగస్థులు ఆమెతో చేతులు కలిపారు. హంతకులతో మాట్లాడి రూ.10 లక్షల సుపారీ ఇచ్చారని పోలీసులు వివరించారు. అనుమానంతో భార్యను అదుపులోనికి తీసుకోవడంతో హత్య సంఘటన దాదాపుగా ఒక కొలిక్కి వచ్చినట్లైందని పోలీసులు తెలిపారు.