Vizag: విశాఖకు కార్యాలయాలను తరలించొద్దు: ఏపీ హైకోర్టు

అమరావతి: విశాఖపట్నానికి రాష్ట్ర ప్రభుత్వ కార్యాలయాల తరలింపుపై ఏపీ ప్రభుత్వం జారీ చేసిన జీవోపై రాష్ట్ర హైకోర్టు కీలక ఆదేశాలు ఇచ్చింది. ఈ మేరకు కార్యాలయాలను ఇప్పుడప్పుడే తరలించొద్దని ఆదేశించింది. కార్యాలయాల తరలింపు జీవోను సవాల్‌ చేస్తూ హైకోర్టులో దాఖలైన పలు పిటిషన్లు శనివారం ధర్మాసనం ముందుకు విచారణకు వచ్చాయి. అయితే.. సంబంధిత పిటిషన్లను ఏ బెంచ్‌ విచారణ చేపట్టాలో త్వరలో ప్రధాన న్యాయమూర్తి తేలుస్తారని పేర్కొంది. సీజే బెంచ్‌ ఎదుట ఈ పిటిషన్లను ఉంచాలని రిజిస్ట్రీకి సూచించింది. విచారణ పూర్తయ్యే వరకు కార్యాలయాలను తరలించొద్దని శనివారం సాయంత్రం ప్రభుత్వానికి హైకోర్టు లిఖితపూర్వక ఆదేశాలు జారీ చేసింది.