AP NRT: కిర్గిజ్‌స్థాన్‌లో చిక్కుకున్న తెలుగు విద్యార్థులను తీసుకొచ్చేందుకు ప్రయత్నాలు: ఏపీ ఎన్‌ఆర్‌టీ

అమరావతి: కిర్గిజ్‌స్థాన్‌ (Kyrgyzstan)లో చిక్కుకున్న తెలుగు విద్యార్థులను స్వదేశానికి రప్పించేందుకు ప్రయత్నాలు జరుగుతున్నాయని ఏపీ ఎన్‌ఆర్‌టీ సొసైటీ సీఈవో హేమలత తెలిపారు. విదేశీ వ్యవహారాల శాఖ గురువారం నుంచి ప్రతిరోజు కిర్గిజ్‌స్థాన్‌లోని బిష్కెక్‌  నుంచి దిల్లీకి నేరుగా రెండు విమానాలు నడుపుతోందని వెల్లడించారు. అక్కడి తెలుగు విద్యార్థులతో ఏపీ ఎన్‌ఆర్‌టీ సొసైటీ నిరంతరం మాట్లాడుతూ కౌన్సెలింగ్‌ ఇస్తోందన్నారు. విద్యార్థుల భద్రతపై ఎప్పటికప్పుడు విదేశీ వ్యవహారాల శాఖకు తెలియజేస్తున్నామన్నారు.

ప్రస్తుతం పరిస్థితి సాధారణంగానే ఉన్నందున విద్యార్థులు స్వదేశానికి తిరిగి వచ్చే ముందు నేషనల్‌ మెడికల్‌ కమిషన్‌ మార్గదర్శకాలు పరిగణనలోకి తీసుకోవాలని కోరారు. కిర్గిజ్‌స్థాన్‌లోని భారతీయ విద్యార్థులు బిష్కెక్‌లోని రాయబార కార్యాలయంలో సంప్రదించవచ్చని తెలిపారు. భారత రాయబార కార్యాలయం 0555710041 హెల్ప్‌లైన్‌ నెంబరు ఏర్పాటు చేసిందని వివరించారు. కిర్గిస్థాన్‌ రాజధాని నగరం బిష్కెక్‌లో విదేశీ విద్యార్థులను లక్ష్యంగా చేసుకొని ఇటీవల ఓ మూక హింసకు పాల్పడిన విషయం తెలిసిందే.