Kunja Satyavathi: భద్రాచలం మాజీ ఎమ్మెల్యే కుంజా సత్యవతి కన్నుమూత

భద్రాచలం: భద్రాద్రి కొత్తగూడెం జిల్లా భద్రాచలం మాజీ ఎమ్మెల్యే, భాజపా రాష్ట్ర కార్యదర్శి కుంజా సత్యవతి(52) (Kunja Satyavathi) కన్నుమూశారు. తీవ్ర అస్వస్థతకు గురైన ఆమె.. భద్రాచలం ప్రైవేటు ఆస్పత్రిలో చికిత్స పొందుతూ ఇవాళ తెల్లవారుజామున తుదిశ్వాస విడిచారు. 2009లో కాంగ్రెస్ నుంచి పోటీ చేసిన సత్యవతి.. 2009 నుంచి 2014 వరకు ఎమ్మెల్యేగా పనిచేశారు. ఈ అసెంబ్లీ ఎన్నికల్లో భాజపా అభ్యర్థిగా బరిలో ఉండనున్నట్లు ఊహగానాలు వెలువడ్డాయి. ఇంతలోనే ఈ విషాదం చోటు చేసుకోవడం గమనార్హం.

సత్యవతి భౌతికకాయానికి భద్రాచలం ఎమ్మెల్యే పొదెం వీరయ్య నివాళులర్పించారు. ఆమె ఆకస్మిక మరణం పట్ల భాజపా రాష్ట్ర అధ్యక్షుడు కిషన్‌ రెడ్డి, టీపీసీసీ అధ్యక్షుడు రేవంత్‌ రెడ్డి, నేతలు తుమ్మల నాగేశ్వరరావు, డీకే అరుణ సంతాపం తెలిపారు. పేదలు, గిరిజనుల అభ్యున్నతికి సత్యవతి ఎంతో కృషి చేశారని కొనియాడారు.