Tirupati: శేషాచల అటవీ ప్రాంతంలో ఏనుగుల బీభత్సం.. రైతుకు తీవ్ర గాయాలు

చంద్రగిరి గ్రామీణం: తిరుపతి జిల్లా చంద్రగిరి మండలంలోని శేషాచల అటవీ ప్రాంతంలో ఏనుగులు బీభత్సం సృష్టించాయి. మండలంలోని చిన్న రామాపురం పంచాయతీ పరిధిలో ఉన్న యమాలపల్లి, కొండ్రెడ్డి కండ్రిగ గ్రామాల్లో అర్ధరాత్రి దాటాక పంట పొలాలను ధ్వంసం చేశాయి. కాపలాగా ఉన్న రైతు మనోహర్ రెడ్డిపైనా దాడి చేశాయి. తీవ్రంగా గాయపడిన రైతును అటవీ శాఖ అధికారులు తిరుపతి రుయా ఆస్పత్రికి తరలించారు. గత 20 రోజులుగా తరచూ రాత్రి వేళల్లో సుమారు 17 ఏనుగుల గుంపు పొలాలపై పడటంతో చేతికి అందివచ్చిన పంట చేజారిపోతోందని రైతులు ఆవేదన వ్యక్తం చేస్తున్నారు. ఏనుగుల దాడులు భరించలేకపోతున్నామని.. ఎప్పుడు ఏ వైపు నుంచి వస్తాయోనని వణికిపోతున్నామన్నారు. అవి అడవుల నుంచి గ్రామాల వైపు రాకుండా ప్రభుత్వం చర్యలు తీసుకోవాలని కోరుతున్నారు.