Covid 19: జేఎన్‌ 1 ప్రభావం తక్కువే: డబ్ల్యూహెచ్‌వో

ఇంటర్నెట్‌ డెస్క్‌: కేరళలో వెలుగు చూసిన కొవిడ్-19 ఉపరకం జేఎన్‌-1 (COVID subvariant JN.1) పట్ల అప్రమత్తంగా ఉండాలని రాష్ట్ర ప్రభుత్వాలకు కేంద్రం  సూచించిన విషయం తెలిసిందే. అయితే, ఈ వేరియంట్‌ గురించి భయపడాల్సిన అవసరం లేదని కేరళ ఆరోగ్యశాఖ మంత్రి వీణా జార్జ్‌, పలువురు వైద్య నిపుణులు వెల్లడించారు. తాజాగా ప్రపంచ ఆరోగ్య సంస్థ (WHO) కూడా ఇదే మాట చెబుతోంది. జేఎన్‌-1 అనేది ప్రజల ఆరోగ్యంపై పెద్దగా ప్రభావం చూపించదని ప్రకటించింది. దీన్ని ‘వేరియంట్‌ ఆఫ్‌ ఇంట్రెస్ట్‌’గా వర్గీకరించింది.

ఇప్పటి వరకు లభించిన ఆధారాలు, పరిశోధన ప్రకారం.. ప్రపంచవ్యాప్తంగా ఉన్న ప్రజలపై ఈ ఉపరకం ప్రభావం చాలా తక్కువగా ఉన్నట్లు డబ్ల్యూహెచ్‌వో వెల్లడించింది. ప్రస్తుతం అందుబాటులో ఉన్న వ్యాక్సిన్లు జేఎన్‌.1తోపాటు ఇతర వేరియంట్ల నుంచి కూడా రక్షణ కల్పిస్తాయని పేర్కొంది. 

కేరళలోని తిరువనంతపురం జిల్లా కరకుళం ప్రాంతంలో నవంబరు 18న నిర్వహించిన ఆర్టీ-పీసీఆర్‌ పరీక్షల్లో 79 ఏళ్ల బాధితురాలికి కొవిడ్‌ సోకినట్లు వెల్లడైంది. ఆ నమూనాలో జేఎన్‌.1 ఉపరకం ఉన్నట్లు తేలింది. తొలిసారిగా ఈ ఏడాది సెప్టెంబరులో జేఎన్‌.1 ఉపరకం అమెరికాలో వెలుగు చూసింది. చైనా సహా పలు దేశాల్లో ఈ ఉపరకం కేసులు పెరుగుతున్నట్లు అంచనా.