Andhrapradesh News: విశాఖలో ప్రయోగాత్మకంగా స్మార్ట్ మీటర్ల ఏర్పాటు

విశాఖపట్నం: ప్రస్తుతం నెలకు వినియోగిస్తున్న యూనిట్ల మేరకే విద్యుత్తు బిల్లు మొత్తాన్ని నగదు, డిజిటల్ రూపంలో డిస్కంలకు చెల్లిస్తున్నాం. ఇకపై ముందుగానే డబ్బులు చెల్లించి.. సరిపడా విద్యుత్తును కొనుగోలు చేసుకునే వెసులుబాటు అందుబాటులోకి రానుంది. ఈ మేరకు ప్రీపెయిడ్ మీటర్లను అందుబాటులోకి తెస్తున్నారు. హైదరాబాద్‌కు చెందిన ఐబోట్ ఎనర్జీ సిస్టమ్స్ ప్రైవేట్ లిమిటెడ్ సంస్థ ప్రయోగాత్మకంగా ఈ మీటర్ల ఏర్పాటుకు ముందుకు వచ్చింది. రాష్ట్రంలో తొలిసారి విశాఖలో ప్రయోగాత్మకంగా 100 చోట్ల ఈ స్మార్ట్ మీటర్లను ఏర్పాటు చేశారు. విశాఖ సర్కిల్ కార్యాలయంలోని జోన్-1 పరిధిలో.. 95 సింగిల్ ఫేజ్, 5 త్రీఫేజ్ కనెక్షన్లకు ఈ మీటర్లను అనుసంధానం చేసి పరీక్షిస్తున్నారు. బ్యాలెన్స్‌, రీఛార్జ్‌ సమాచారం వినియోగదారులకు చేరవేయడం లాంటి సాంకేతిక అంశాలను పరిశీలించడం సహా.. ప్రీపెయిడ్ మీటర్ల పనితీరును అంచనా వేసి ఉన్నతాధికారుల ఆదేశాలతో ముందుకు వెళ్తామని అధికారులు వెల్లడించారు.