Mulugu: ములుగు జిల్లాలో అడవిలో చిక్కుకున్న 84 మంది పర్యాటకులు

వెంకటాపురం: ములుగు జిల్లాలో దాదాపు 84 మంది పర్యాటకులు అడవిలో చిక్కుకున్నారు. బుధవారం ఉదయం జిల్లాలోని వెంకటాపురం పరిధిలో ఉన్న ముత్యంధార జలపాతం సందర్శనకు వెళ్లిన పర్యాటకులు సాయంత్రం తిరిగి వస్తుండగా మార్గమధ్యలో భారీ వర్షాలకు వాగు ఉప్పొంగింది. దీంతో 60 మంది పర్యాటకులు అడవిలోనే ఉండిపోయారు. డయల్‌ 100కు పర్యాటకులు సమాచారం ఇవ్వడంతో విషయం వెలుగులోకి వచ్చింది. 

అడవిలో చిక్కుకున్న పర్యాటకులను కాపాడతాం.. ములుగు ఎస్పీ

అడవిలో చిక్కుకున్న పర్యాటకులను కాపాడతామని మలుగు ఎస్పీ గౌష్‌ ఆలం అన్నారు. పర్యాటకులను కాపాడేందుకు డీఆర్‌ఎఫ్‌, ఎన్డీఆర్‌ఎఫ్‌ బృందాలు ప్రయత్నం చేస్తున్నాయని ఆయన చెప్పారు. పర్యాటకులతో ఫోన్‌లో మాట్లాడినట్టు ఆయన వెల్లడించారు. వాగును దాటేందుకు ప్రయత్నించవద్దని వారిని హెచ్చరించినట్టు ఎస్పీ పేర్కొన్నారు. రెస్క్యూ బృందాలు వారిని కాపాడతాయని ఎస్పీ తెలిపారు. వారి కోసం ఆహార పదార్థాలు, రక్షణ పరికరాలను పంపిస్తున్నామని ఎస్పీ వివరించారు.