నన్ను జైలుకు పంపాలని కుట్ర పన్నుతున్నారు: దస్తగిరి

కడప: పులివెందులలో కడప ఎంపీ వైఎస్‌ అవినాష్‌ అనుచరులు తనను బెదిరిస్తున్నారని వైఎస్ వివేకా హత్య కేసులో కీలక సాక్షి, డ్రైవర్‌ దస్తగిరి ఆరోపించాడు. పిల్లాడిని హింసించాననే ఆరోపణలతో పులివెందుల పోలీసులు తనపై తప్పుడు కేసు నమోదు చేసినట్లు తెలిపాడు. సోమవారం తన భార్య షబానాతో కలిసి దస్తగిరి కడప ఎస్పీ కార్యాలయానికి వచ్చాడు. పులివెందుల పోలీసులు తనపై నమోదు చేసిన తప్పుడు కేసుపై కడప ఎస్పీకి ఫిర్యాదు చేసినట్లు తెలిపాడు. ఈ కేసు గురించి సీబీఐ ఎస్పీకి కూడా సమాచారం అందించినట్లు చెప్పాడు. వైఎస్‌ అవినాష్‌ తనను ఎలాగైనా జైలు పంపాలని కుట్ర పన్నుతున్నారని ఫిర్యాదులో పేర్కొన్నాడు.