Vaccination: కోటి మంది టీనేజర్లకు రెండు డోసులూ పూర్తి

దిల్లీ: వ్యాక్సినేషన్‌లో భారత్‌ మరో మైలురాయి చేరుకుంది. జనవరి 3 నుంచి టీనేజర్లకు ప్రారంభించిన వ్యాక్సినేషన్‌ కార్యక్రమంలో భాగంగా కోటి మందికి రెండు డోసులూ అందించింది. ఇప్పటివరకు కోటి మందికి పైగా టీనేజర్లకు వ్యాక్సిన్‌ రెండు డోసులూ పూర్తయినట్టు కేంద్ర ఆరోగ్యశాఖ మంత్రి మన్‌సుఖ్‌మాండవీయ వెల్లడించారు. 15 -18 ఏళ్ల వయసు కలిగిన వారిలో 5.04 కోట్ల మందికి తొలి డోసు అందించినట్టు తెలిపారు. ఈ మేరకు ఆయన ట్వీట్‌ చేశారు. మరోవైపు, గడిచిన 24గంటల వ్యవధిలోనే దేశవ్యాప్తంగా అర్హులైనవారందరికీ 53.61లక్షల డోసులు పంపిణీ చేశారు. ఈరోజు ఉదయం 7గంటల వరకు దేశవ్యాప్తంగా 170.87 కోట్ల డోసులు పంపిణీ పూర్తయింది. రిజిస్ట్రార్‌ జనరల్‌ ఆఫ్‌ ఇండియా గణాంకాల ప్రకారం 2021-22 నాటికి దేశ వ్యాప్తంగా 15-18 ఏళ్ల వయసువారు 7.4కోట్ల మంది ఉన్నట్టు అంచనా.