అయోధ్య రామాలయానికి బాంబు బెదిరింపు

నగరంలోని వ్యక్తికి ఫోన్‌ చేసి హెచ్చరిక

అయోధ్య: రామ జన్మభూమి ఆలయ సముదాయాన్ని బాంబుతో పేల్చేస్తానని ఓ వ్యక్తికి బెదిరింపు ఫోను వచ్చినట్లు అయోధ్య పోలీసులు గురువారం వెల్లడించారు. వారు తెలిపిన వివరాల ప్రకారం.. అయోధ్యలోని రామ్‌కోట్‌ ప్రాంతానికి చెందిన మనోజ్‌కు ఓ గుర్తు తెలియని వ్యక్తి ఫోన్‌ చేశాడు. గురువారం ఉదయం 10 గంటలకు ఆలయ సముదాయాన్ని పేల్చేస్తానని బెదిరించాడు. మనోజ్‌ వెంటనే ఈ విషయాన్ని పోలీసులకు తెలపడంతో అప్రమత్తమైన సిబ్బంది జిల్లావ్యాప్తంగా భద్రతను కట్టుదిట్టం చేశారు. ఘటనపై కేసు నమోదు చేసుకుని దర్యాప్తు చేస్తున్నారు.