భారత్‌-చైనా సత్సంబంధాలతో ప్రపంచానికి మేలు

రష్యా రాయబారి డెనిస్‌ అలిపోవ్‌ ఉద్ఘాటన

దిల్లీ: భారత్‌-చైనా మధ్య సంబంధాలు సాధారణ స్థితికి చేరుకోవాలని, దానివల్ల ఆసియాకే కాకుండా యావత్‌ ప్రపంచ భద్రతకూ ఎంతో లబ్ధి కలుగుతుందని మన దేశంలో రష్యా రాయబారి డెనిస్‌ అలిపోవ్‌ చెప్పారు. భారత్‌-రష్యా వ్యూహాత్మక భాగస్వామ్యంలో తదుపరి అడుగులపై సోమవారం దిల్లీలో జరిగిన సదస్సులో ఆయన ప్రసంగించారు. భారత్‌-చైనా ఘర్షణల్ని తనకు అనుకూలంగా వాడుకునేందుకు అమెరికా చురుగ్గా ప్రయత్నిస్తోందని ఆరోపించారు. చైనాతో రష్యాకు ఉన్న సరిహద్దు వివాదాలను చర్చల ద్వారా పరిష్కరించుకునేందుకు 40 ఏళ్లు పట్టిందనీ, సమస్య నుంచి బయటపడేందుకు అదొక్కటే మార్గమని చెప్పారు. సరిహద్దు విభేదాలు పూర్తిగా భారత్‌-చైనా ద్వైపాక్షిక అంశమనీ, తాము దానిలో జోక్యం చేసుకోబోమని స్పష్టంచేశారు. ఎంత త్వరగా ఈ రెండు దేశాల మధ్య సాధారణ పరిస్థితులు నెలకొంటే ప్రపంచానికి అంత మంచిదని, దీనికి అవసరమైతే తమ వంతు చేయూత అందిస్తామని చెప్పారు. త్వరలో రష్యా నుంచి మూడో విడత ఎస్‌-400 గగనతల రక్షణ వ్యవస్థలు సరఫరా అవుతాయని వివరించారు.