Haj 2022: హజ్‌ యాత్ర దరఖాస్తుల స్వీకరణ షురూ.. ఈ సారి భారీ సంస్కరణలు!

ముంబయి: పవిత్ర ‘హజ్ యాత్ర- 2022’ ఆన్‌లైన్‌ దరఖాస్తుల ప్రక్రియను కేంద్ర ప్రభుత్వం సోమవారం ప్రారంభించింది. ముంబయిలోని హజ్ హౌస్‌లో కేంద్ర మైనారిటీ వ్యవహారాల మంత్రి ముఖ్తార్ అబ్బాస్ నఖ్వీ యాత్రకు సంబంధించిన వివరాలు వెల్లడించారు. వచ్చే ఏడాది జనవరి 31 వరకు దరఖాస్తు చేసుకోవచ్చని తెలిపారు. ఈ సారి హజ్‌ యాత్రలో పూర్తి ఆన్‌లైన్‌ ప్రక్రియ, వోకల్‌ ఫల్‌ లోకల్‌కు ప్రోత్సాహం తదితర అనేక సంస్కరణలు తీసుకొచ్చినట్లు చెప్పారు. దీంతోపాటు యాత్రికులకు మెరుగైన సౌకర్యాలు కల్పించనున్నట్లు మంత్రి వివరించారు.

రెండు డోసుల టీకా తప్పనిసరి..

* కరోనా కారణంగా 2020, 2021లో భారతీయులకు హజ్‌ యాత్రకు అనుమతి లభించలేదు. ఈ విడత సైతం.. కొవిడ్ ప్రొటోకాల్స్‌, భారత్‌, సౌదీ అరేబియా ప్రభుత్వాల నిబంధనల ప్రకారం ఎంపిక ప్రక్రియ చేపట్టనున్నారు. యాత్రికులకు రెండు డోసుల టీకా పూర్తయి ఉండాలి.

* తొలిసారి పూర్తి ఆన్‌లైన్‌ విధానంలో దరఖాస్తుల ప్రక్రియ చేపడుతుండటం విశేషం. మొబైల్ యాప్ ద్వారా కూడా అప్లై చేసుకోవచ్చు. యాత్రికులకు రాయితీ సౌకర్యం తొలగించినా.. ఆర్థిక భారం పడకుండా చర్యలు తీసుకోనున్నారు.

* భారత్‌ హజ్ యాత్రికులు ఈ సారి 'లోకల్ ఫర్‌ వోకల్'ను ప్రోత్సహించేలా ఏర్పాట్లు. సౌదీ అరేబియాలో విదేశీ కరెన్సీతో బెడ్ షీట్లు, దిండ్లు, టవల్స్ ఇతరత్రా సామగ్రి కొనుగోలు చేయాల్సిన అవసరం లేకుండా.. భారత్‌లోనే స్వదేశీ ఉత్పత్తులు అందుబాటులో ఉంచేలా చర్యలు.

* హజ్- 2022 కోసం దేశంలో ఎంబార్కేషన్ పాయింట్లు 21 నుంచి 10కి తగ్గింపు. హైదరాబాద్‌, ముంబయి, బెంగళూరు, కొచ్చిన్, దిల్లీ, అహ్మదాబాద్, గువాహటి, కోల్‌కతా, లఖ్‌నవూ, శ్రీనగర్‌లలో ఏర్పాటు.

* యాత్రికులకు ‘ఈ- మసిహా’ పేరిట ఆరోగ్య కార్డులు జారీ చేయనున్నారు. దీంతోపాటు ‘ఈ- లగేజీ ప్రీ ట్యాగింగ్‌’ ద్వారా ప్రయాణం, బస వివరాలు తెలుసుకోవచ్చు.

* ‘మెహ్‌రం (పురుష తోడు) అవసరం లేకుండా హజ్‌ యాత్ర’ కేటగిరిలో 2020, 2021లో మూడు వేలకు పైగా మహిళలు దరఖాస్తు చేసుకున్నారు. 2022కు సైతం అవి చెల్లుబాటు కానున్నాయి. కొత్తగా కూడా దరఖాస్తు చేసుకోవచ్చు. ఈ కేటగిరీలో ఉన్నవారికి లాటరీ విధానంలో ఎంపిక నుంచి మినహాయింపు ఉంటుంది.