Priyanka Gandhi : బొకే ఇచ్చారు సరే.. మరి పూలు ఎక్కడ..?: ప్రియాంకాగాంధీ వీడియో వైరల్‌

భోపాల్‌: ఐదు రాష్ట్రాల అసెంబ్లీ ఎన్నికల వేళ అన్ని పార్టీల అగ్రనేతలు విరామం లేకుండా ప్రచారం నిర్వహిస్తున్నారు. ఈ ఎన్నికల ప్రచారంలో సరదా పరిణామం ఒకటి చోటుచేసుకుంది. సభా వేదికపై కాంగ్రెస్‌(Congress) అగ్రనేత ప్రియాంకా గాంధీ(Priyanka Gandhi)కి ఓ నాయకుడు బొకే ఇవ్వగా.. దానిని చూసి ఆమె  నవ్వకుండా ఉండలేకపోయారు. ఇంతకీ ఏం జరిగిందంటే..?

సోమవారం ప్రియాంక(Priyanka Gandhi) మధ్యప్రదేశ్‌(Madhya Pradesh)లోని ఇందౌర్‌లో ఎన్నికల ప్రచారంలో పాల్గొన్నారు. ఆ సందర్భంగా హస్తం పార్టీ నేతలు వేదికపై ఒకరి తర్వాత ఒకరు ఆమెను కలిశారు. కొందరు ఆమెతో ఫొటోలు దిగారు. మరికొందరు పూలు ఇచ్చి ఆమెను పలకరించారు. ఈ సమయంలోనే ఓ నేత వేదికపైకి వచ్చి ఆమెకు బొకే ఇచ్చారు. దానిని చూసిన వెంటనే ప్రియాంక కాస్త ఆశ్చర్యంగా మొహం పెట్టి.. నవ్వుకున్నారు. ఆ బొకేలో పూలు లేకపోవడమే అందుకు కారణం. అక్కడితో ఆగకుండా ఆ బొకేను చూపిస్తూ.. ఇందులో పూలు ఏవి? అని ఆ నేతను సరదాగా ప్రశ్నించడంతో సభావేదికపై నవ్వులు విరబూశాయి. దీనికి సంబంధించిన దృశ్యాలు సామాజిక మాధ్యమాల్లో వైరల్‌గా మారాయి.

ఓటు వేయకుండానే వెళ్లిపోయిన సీఎం.. కారణమిదే..!

ఆ వెంటనే ప్రసంగాన్ని ప్రారంభించిన ప్రియాంక(Priyanka Gandhi).. నిత్యావసరాల ధరల పెరుగుదలపై భాజపా ప్రభుత్వంపై విమర్శలు గుప్పించారు. కేంద్రరాష్ట్ర ప్రభుత్వ విధానాలను ప్రశ్నించారు. నవంబర్‌ 17న మధ్యప్రదేశ్‌లో అసెంబ్లీ ఎన్నికల పోలింగ్‌ జరగనున్న సంగతి తెలిసిందే. ఈ ఎన్నికల్లో సత్తా చాటి, తిరిగి అధికారంలోకి వచ్చేందుకు కాంగ్రెస్‌ గట్టి ప్రయత్నాలు చేస్తోంది.