ఆ పాపకు రూ.16 కోట్ల ఇంజెక్షన్‌..

ఇంటర్నెట్‌ డెస్క్‌: ముంబయిలో అరుదైన వ్యాధి(స్పైనల్‌ మస్క్యులర్‌ ఆట్రోపీ)తో బాధపడుతున్న చిన్నారి టీరాకు ఎట్టకేలకు చికిత్స మొదలైంది. ఈ మేరకు సుమారు రూ.16 కోట్ల రూపాయల విలువైన ‘జోల్‌జీన్‌స్మా’ ఇంజెక్షన్‌ను ఆ పాపకు అందించారు. ఈ వ్యాధిపై పోరుకు ‘క్రౌడ్‌ ఫండింగ్‌’ ద్వారా నెటిజన్లు రూ.16కోట్లు విరాళాలు అందించడం విశేషం. ఈ వ్యాధికి భారత్‌లో చికిత్స, ఔషధాలు అందుబాటులో లేవు. 
అతి ఖరీదైన మందులను అమెరికా నుంచి దిగుమతి చేసుకోవాల్సి వచ్చింది. దీనికి గాను సుమారు రూ.16కోట్ల రూపాయలు అవసరమవ్వగా ఆ చిన్నారి తల్లిదండ్రులు  ప్రియాంక, మిహిర్‌ కామత్‌ ‘క్రౌడ్‌ ఫండింగ్‌’ ద్వారా సేకరించారు. ఇంజెక్షన్‌ దిగుమతికి గాను ఎక్సైజ్‌ సుంకం సహా.. జీఎస్టీని కేంద్రం రద్దు చేయాలని మహారాష్ట్ర మాజీ ముఖ్యమంత్రి దేవేంద్ర ఫడణవీస్‌.. ప్రధానికి విజ్ఞప్తి చేశారు. దీనిపై సానుకూలంగా స్పందించిన ప్రధాని కార్యాలయం సుమారు 6.5 కోట్ల రూపాయల మేర సుంకాలు రద్దు చేసి చేయూతను అందించింది. ప్రపంచవ్యాప్తంగా ఇప్పటివరకూ 11 మంది పిల్లలకు ‘జోల్‌జీన్‌స్మా’ ఇంజెక్షన్‌ ఇచ్చారు.