కాలేజీలో కరెంట్‌ లేక.. కారు లైట్ల వెలుతురులో విద్యార్థులకు ‘పరీక్ష’

మోతిహరి: బిహార్‌లో సిబ్బంది వైఫల్యం కారణంగా దాదాపు 400 మంది 12వ తరగతి విద్యార్థులు కార్ల హెడ్‌లైట్ల వెలుతురులో పరీక్ష రాయాల్సి వచ్చింది. మోతిహరిలోని మహారాజా హరేంద్ర కిశోర్‌ సింగ్ కాలేజీలో మంగళవారం ఈ ఘటన చోటుచేసుకుంది. అసలేం జరిగిందంటే..

బిహార్‌ వ్యాప్తంగా నిన్న 12వ తరగతి పరీక్షలు ప్రారంభమయ్యాయి. తొలి పరీక్ష హిందీ  రెండు భాగాలుగా నిర్వహించారు. తొలి భాగం పరీక్ష ఉదయం జరగ్గా.. రెండో పేపర్‌ షెడ్యూల్‌ను మధ్యాహ్నం 1.45 నుంచి సాయంత్రం 5 గంటల వరకు నిర్ణయించారు. అయితే మహారాజా హరేంద్ర కిశోర్‌ సింగ్‌ పరీక్షా కేంద్రంలో ముందస్తుగా విద్యార్థుల సీటింగ్‌ ఏర్పాట్లు చేయకపోవడంతో గందరగోళం తలెత్తింది. దీంతో విద్యార్థులు, వారి తల్లిదండ్రులు ఆందోళనకు దిగారు. పోలీసులు రంగంలోకి దిగి పరిస్థితికి అదుపులోకి తెచ్చారు.

ఈ క్రమంలోనే పరీక్ష చాలా ఆలస్యంగా మొదలయ్యింది. విద్యార్థులకు జవాను పత్రాలు అందేసరికి సాయంత్రం 4.30 గంటలు దాటింది. అప్పుడే అసలు సమస్య మొదలైంది. ఆ కాలేజీకి ఎలాంటి విద్యుత్‌ సరఫరా లేకపోవడంతో జనరేటర్లతో నడిపిస్తున్నారు. అయితే కొన్ని గదుల్లో ఆ సౌకర్యం కూడా లేక, కొంతమంది విద్యార్థులను కారిడార్లలో కూర్చోబెట్టారు. కానీ అప్పటికే చీకటి పడింది. దీంతో కార్లలో వచ్చిన కొంతమంది విద్యార్థుల తల్లిదండ్రులు హెడ్‌లైట్లు ఆన్‌ చేయడంతో ఆ వెలుతురులో విద్యార్థులు పరీక్ష పూర్తిచేశారు. 

ఈ ఘటనకు సంబంధించిన ఫొటోలు సోషల్‌మీడియాలో రావడంతో ఇది వివాదాస్పదంగా మారింది. దీనిపై తూర్పు చంపారన్‌ జిల్లా కలెక్టర్‌ స్పందించారు. ఘటనపై దర్యాప్తు కోసం జిల్లా విద్యాధికారి నేతృత్వంలోని కమిటీని నియమించినట్లు తెలిపారు.