బిడ్డ కావాలి.. నా భర్తకు పెరోల్‌ ఇవ్వండి: ఓ మహిళ అభ్యర్థన

భోపాల్‌: మధ్యప్రదేశ్‌ (Madhya Pradesh)లోని గ్వాలియర్‌ సెంట్రల్‌ జైలు అధికారులకు ఓ మహిళ అరుదైన అభ్యర్థన చేసింది. తనకు సంతానం కావాలని.. అందుకోసం జైల్లో ఉన్న తన భర్తను పెరోల్‌ (Parole)పై విడుదల చేయాలని ఆ మహిళ దరఖాస్తు చేసుకుంది.

గ్వాలియర్‌లోని శివ్‌పురి ప్రాంతానికి చెందిన దారా సింగ్‌ జాతవ్‌ అనే వ్యక్తికి ఏడేళ్ల క్రితం ఓ మహిళతో వివాహమైంది. అయితే పెళ్లయిన కొద్ది రోజులకే ఓ హత్య కేసులో పోలీసులు అతడిని అరెస్టు చేశారు. ఆ కేసులో అతడు దోషిగా తేలడంతో జీవితఖైదు విధించారు. అప్పటి నుంచి గ్వాలియర్‌ సెంట్రల్‌ జైలు (Gwalior Central Jail )లో శిక్ష అనుభవిస్తున్నాడు. అయితే, ఇటీవల దారా భార్య, కుటుంబసభ్యులు జైలు అధికారులకు ఓ దరఖాస్తు చేసుకున్నారు. తనకు పిల్లలు కావాలని, అందువల్ల తన భర్తను పెరోల్‌ (Parole)పై విడుదల చేయాలని దారా భార్య అభ్యర్థించింది.

దీనిపై సెంట్రల్‌ జైలు సూపరిండెంట్‌ మాట్లాడుతూ.. ఆ మహిళ దరఖాస్తును శివ్‌పురి ఎస్పీకి పంపించినట్లు తెలిపారు. మధ్యప్రదేశ్ (Madhya Pradesh) జైలు నిబంధనల ప్రకారం.. జీవితఖైదు పడిన దోషి రెండేళ్ల శిక్షాకాలం పూర్తి చేసుకున్న తర్వాత అతడి సత్ప్రవర్తన ఆధారంగా పెరోల్‌ పొందే అవకాశముందని జైలు అధికారులు తెలిపారు. అయితే దీనిపై జిల్లా కలెక్టర్‌ తుది నిర్ణయం తీసుకుంటారని చెప్పారు.

కాగా.. గతంలోనూ ఓ రాజస్థాన్‌ మహిళ ఇలాంటి అభ్యర్థనతోనే కోర్టును ఆశ్రయించగా.. అక్కడి హైకోర్టు అరుదైన తీర్పునిచ్చిన విషయం తెలిసిందే. సంతానం పొందేందుకు తనకున్న హక్కును వినియోగించుకునేందుకు జైల్లో ఉన్న తన భర్తను విడుదల చేయాలని ఓ మహిళ పిటిషన్‌ దాఖలు చేసింది. దీనిపై అప్పట్లో విచారణ జరిపిన జోధ్‌పుర్‌ ధర్మాసనం.. ఆ ఖైదీకి 15 రోజుల పెరోల్‌ మంజూరు చేసింది.