తొలి రెండు స్థానాల్లో మనోళ్లే

ఆస్కార్‌ సందడి అట్టహాసంగా ముగిసింది. ఈసారి వేడుకలపై భారతీయ చిత్రాలు గట్టి ప్రభావమే చూపించాయి. ‘ఆర్‌ఆర్‌ఆర్‌’, ‘ది ఎలిఫెంట్‌ విస్పరర్స్‌’ పురస్కారాలతో మెరిశాయి. ఆస్కార్‌ బరిలో నిలిచిన మన చిత్రాలు... అందులో నటించిన తారల గురించి అంతర్జాతీయ స్థాయిలో ప్రముఖంగా చర్చ జరిగింది. ఈ పరిణామం మన చిత్ర పరిశ్రమకి ఎంతో మేలు చేసేదే. ఆస్కార్‌ సందర్భంగా సామాజిక మాధ్యమాల్లో
ఎక్కువసార్లు ప్రస్తావనకొచ్చిన సినిమాగా మన ‘ఆర్‌ఆర్‌ఆర్‌’ నిలిచింది. ఆ సినిమాలో నటించిన ఎన్టీఆర్‌, రామ్‌చరణ్‌లు కూడా ఎక్కువసార్లు ప్రస్తావించిన నటుల జాబితాలో వరుసగా తొలి రెండు స్థానాల్ని కైవసం చేసుకున్నారు. సామాజిక మాధ్యమాల్ని విశ్లేషించే సంస్థలు ఈ గణాంకాల్ని వెల్లడించాయి. ఆస్కార్‌ ప్రదానోత్సవంలోనూ మన తారలు ఎన్టీఆర్‌, రామ్‌చరణ్‌లు ప్రధాన ఆకర్షణగా నిలిచారు. వాళ్లు ధరించిన దుస్తులు అంతర్జాతీయ స్థాయిలో చర్చని లేవనెత్తాయి.

మరోసారి సీక్వెల్‌ చర్చ

ఉత్తమ ఒరిజినల్‌ పాట విభాగంలో  ‘ఆర్‌ఆర్‌ఆర్‌’ ఆస్కార్‌ గెలిచాక మరోసారి ఈ సినిమా సీక్వెల్‌ గురించి చర్చ మొదలైంది. ఆస్కార్‌ వేడుక అనంతరం దర్శకుడు రాజమౌళి ఓ ప్రశ్నకి బదులిస్తూ...
‘‘పురస్కారం మాలో ఉత్సాహాన్ని నింపింది. సీక్వెల్‌కి సంబంధించి స్క్రిప్ట్‌ పనుల్ని వేగవంతం చేయడంలో దోహదం చేస్తుంద’’ని స్పష్టతనిచ్చారు.