రజనీ - అమితాబ్‌.. 32ఏళ్ల విరామం తర్వాత!

వెండితెరపై మరో అపురూప కలయికకు రంగం సిద్ధమవుతోంది. కథానాయకులు రజనీకాంత్‌.. అమితాబ్‌ బచ్చన్‌ దాదాపు 32ఏళ్ల విరామం తర్వాత కలిసి తెర పంచుకోనున్నారు. రజనీ 170వ చిత్రంతో ఈ కాంబినేషన్‌ కార్యరూపంలోకి రానుంది. ఇది అమితాబ్‌కు తొలి తమిళ చిత్రం కానుంది. ఈ సినిమాని ‘జై భీమ్‌’ దర్శకుడు టి.జె.జ్ఞానవేల్‌ తెరకెక్కించనున్నారు. లైకా ప్రొడక్షన్స్‌ సంస్థ నిర్మిస్తోంది. బూటకపు ఎన్‌కౌంటర్లకు వ్యతిరేకంగా పోరాడే ఓ రిటైర్డ్‌ పోలీస్‌ ఆఫీసర్‌ కథగా ఈ చిత్రం రూపొందనున్నట్లు తెలిసింది. ఆ పోలీస్‌ పాత్రను రజనీ పోషించనుండగా.. మరో ముఖ్య పాత్రలో అమితాబ్‌ నటించనున్నారని సమాచారం. దీనిపై త్వరలో అధికారిక ప్రకటన వెలువడనుంది. వచ్చే నెలాఖరున ఈ సినిమా పట్టాలెక్కనున్నట్లు తెలుస్తోంది. రజనీ - అమితాబ్‌ చివరిగా 1991లో వచ్చిన ‘హమ్‌’ సినిమాలో కలిసి నటించారు. అంతకు ముందు ‘అంధా కానూన్‌’, ‘గెరాఫ్తార్‌’ చిత్రాల్లోనూ తెర పంచుకున్నారు.