Alia Bhatt: కెమెరానే నా లోకం..

మూడు పదుల వయసులోనే మెప్పించే నటనతో ఇప్పటికే ఎన్నో అవార్డులు గెలుచుకుంది అలియా భట్‌. తాజాగా తన ఖాతాలో ప్రతిష్ఠాత్మక జాయ్‌ అవార్డుల ‘హానరరీ ఎంటర్‌టైన్‌మెంట్‌ మేకర్స్‌’ పురస్కారం చేర్చుకుంది. సౌదీ అరేబియా రాజధాని రియాద్‌లో ఈ పురస్కారం స్వీకరిస్తూ.. తన సంతోషం పంచుకుంది. ‘ఈ అవార్డుకి ఎంపికవడం పట్ల గర్వంగా ఫీలవుతున్నా. సినిమా మాధ్యమం ద్వారా మాలాంటి వాళ్ల ప్రతిభను గుర్తిస్తూ, అందరినీ ఒక గొడుగు కిందకి తీసుకురావడాన్ని స్వాగతిస్తున్నా. నిజానికి నాకు సినిమాలే లోకం. అది తప్ప వేరే ప్రపంచం తెలియదు. ‘లైట్స్‌.. కెమెరా.. యాక్షన్‌’.. ఇవి నిత్యం నా చెవుల్లో మార్మోగుతూనే ఉంటాయి. ఈ పూట రియాద్‌ నగరం ఇచ్చిన ఆ ప్రేమని తీసుకొని వెళ్తున్నా’ అంటూ భావోద్వేగపూరితంగా మాట్లాడింది. తను ప్రస్తుతం ‘జిగ్రా’ అనే సినిమాని నిర్మిస్తూ.. నటిస్తోంది.