Kollywood: మణిరత్నం, శంకర్‌ కాంబోలో నిర్మాణ సంస్థ ప్రారంభం

చెన్నై: కరోనా దెబ్బకి ఓ పక్క థియేటర్లు మూతపడటం, మరో పక్క ఓటీటీల జోరు ఊపందుకోవడం.. ఈ కారణాలతో అందరి దృష్టి ఇప్పుడు డిజిటల్‌ మీడియా వైపు మళ్లింది. ఇటీవలే నెట్‌ఫ్లిక్స్‌లో ‘నవరస’ వెబ్‌సిరీస్‌తో ఓటీటీలో అడుగులువేసిన అగ్రదర్శకుడు మణిరత్నం.. మరో బడా దర్శకుడు శంకర్‌తో చేతులు కలిపి ఓ ‘‘రెయిన్‌ ఆన్ ఫిల్మిమ్స్‌’’ అనే కొత్త ప్రొడక్షన్‌ హౌస్‌ని ఏర్పాటు చేసినట్లు బుధవారం ప్రకటించారు. వీరితో పాటు దర్శకులు గౌతమ్‌ మేనన్‌, వెట్రిమారన్, లింగుస్వామి, మిస్కిన్, సిస్, వసంతబాలన్, లోకేష్ కనగరాజ్, బాలాజీ శక్తివేల్, ఆర్.మురుగదాస్... ఇందులో భాగం కానున్నారు.

ఈ సందర్భంగా వారు మాట్లాడుతూ.. ‘‘ వివిధ ఓటీటీ వేదికలకు వెబ్‌సిరిస్‌ను నిర్మించాలనే లక్ష్యంతో ఈ సంస్థను ఏర్పాటు చేశాం, వెబ్‌సిరీస్‌తో పాటు యాంథలజీలు తీయాలని ఆసక్తి ఉన్న యువ దర్శకులందరికీ ఈ రెయిన్‌ ఆన్‌ ఫిల్మిమ్స్‌ అవకాశం కల్పించనుంది’’ అన్నారు. దర్శకుడు లోకేష్‌ కనగరాజ్‌ ‘విక్రమ్‌’ ప్రస్తుతం షూటింగ్‌ దశలో ఉంది, అనంతరం ఆయన రూపొందించే చిత్రాన్ని రెయిన్‌ ఆన్‌ ఫిలిమ్స్‌ నిర్మించనుంది. కాగా ఈ చిత్రానికి సంబంధించిన తారాగణం, సాంకేతిక బృందాల వివరాలు వెల్లడికావాల్సి ఉంది.