Samantha: అల్ట్రా సంగీత ఉత్సవాల్లో ‘‘ఉ అంటావా’’

‘‘ఉ అంటావా.. మామ.. ఉఊ ఉంటావా’’ అంటూ పుష్ప చిత్రంలో సమంత చేసిన సందడి అంతా ఇంతా కాదు. గతంలో ఈ గీతం య్యూటూబ్‌ వరల్డ్‌ మ్యూజిక్‌లో నంబర్‌ వన్‌ స్థానంలో నిలిచిన విషయం తెలిసిందే. ఇప్పుడు ఈ పాట అమెరికాలో జరిగే అల్ట్రా సంగీత ఉత్సవాల్లో మరోసారి చర్చల్లోకి వచ్చింది. సుకుమార్‌ దర్శకత్వంలో అల్లుఅర్జున్‌ కథానాయకుడిగా  తెరకెక్కిన ‘పుష్ప-ది రైజ్‌’ చిత్రం పాన్‌ ఇండియా స్థాయిలో విడుదలై మంచి విజయాన్ని అందుకుంది. ఈ సినిమాలో ప్రముఖ కథానాయిక సమంత ఓ ప్రత్యేక గీతంలో నర్తించింది. అమెరికాలోని ఫ్లోరిడా రాష్ట్రంలో మార్చి 25 నుంచి ‘అల్ట్రా మ్యూజిక్‌ ఫెస్టివల్‌’ మొదలైంది. ఆదివారం ఈ ఉత్సవాలు  ముగిశాయి. ఈ సందర్భంగా అక్కడ ‘ఉ అంటావా...’ పాటను ప్రదర్శించారు. ఈ  విషయాన్ని, విజువల్స్‌ను సామాజిక మాధ్యమాల్లో పంచుకుంది సమంత. ఈ  సందర్భంగా ఆమె మాట్లాడుతూ  ‘‘నమ్మలేకున్నా. చాలా ఆనందంగా ఉంది. ఈ సంగీత ఉత్సవాల్లో నా పాట ప్రదర్శించడం గర్వంగా ఉంద’’ని చెప్పింది. ఈ చిత్రానికి దేవీశ్రీప్రసాద్‌ సంగీత సారథ్యం వహించగా.. చంద్రబోస్‌ సాహిత్యం అందించారు.