Samantha: అలా కొనసాగించడం నావల్ల కాలేదు!

మయోసైటిస్‌ వ్యాధి నుంచి కోలుకుంటున్న సమంత (Samantha).. సామాజిక మాధ్యమాల్లో మునుపటిలా సందడి చేస్తోంది. తన సినిమాలకు సంబంధించిన కబుర్లు పంచుకుంటూ సినీ ప్రియులకు చేరువ అవుతోంది. ఈ క్రమంలోనే ఆమె తాజాగా తన కొత్త సినిమా ‘శాకుంతలం’ (Shaakuntalam) విషయంలో ఎదురైన ఓ సవాల్‌ను తెలియజేసింది. ఇందులో నటించేటప్పుడు ఆ పాత్ర స్వభావానికి తగ్గట్లుగా ముఖంలో హావభావాలు ఒకేలా పలికించడం.. ఒకే భంగిమలో ఉండటం కష్టంగా అనిపించినట్లు చెప్పింది. ‘‘నడుస్తున్నప్పుడు, మాట్లాడుతున్నప్పుడు, పరిగెత్తేటప్పుడు.. ఆఖరికి ఏడ్చేటప్పుడు కూడా ముఖంలో ఎక్స్‌ప్రెషన్‌ ఒకేలా పెట్టాల్సి వచ్చింది. అలాగే ఈ భంగిమనే కొనసాగించాల్సి వచ్చింది. అలా ఒకే స్టైల్‌ను కొనసాగించడం నావల్ల కాలేదు. దీని కోసం ప్రత్యేక శిక్షణ తీసుకున్నాను. అలా కాకుండా ఈ సాషా (సమంత పెంపుడు కుక్క)ను తీసుకువెళ్లాల్సింది’’ అంటూ దీనంగా చూస్తున్న తన పెంపుడు కుక్క వీడియోతో పాటు ‘శాకుంతలం’ భంగిమలో ఉన్న తన ఫొటోను నెటిజన్లతో పంచుకుంది. ప్రస్తుతం నిర్మాణాంతర పనుల్లో ఉన్న ‘శాకుంతలం’ ఫిబ్రవరి 17న ప్రేక్షకుల ముందుకు రానుంది.