Shahrukh khan: ఓటీటీలోకి ఎంట్రీ ఇవ్వనున్న షారుక్‌

ముంబయి: బాలీవుడ్‌ బాద్‌షా షారుక్‌ ఖాన్‌ అభిమానులకు ఓ గుడ్‌న్యూస్‌. త్వరలోనే ఆయన ఓటీటీలో అడుగుపెట్టనున్నట్లు తెలుస్తోంది. ఈ మేరకు సామాజిక మాధ్యమాల్లో పోస్ట్‌ ద్వారా హింట్‌ ఇచ్చారు. ఇప్పటికే ఆయన తోటి నటీనటులు.. అక్షయ్‌ కుమార్‌, అజయ్‌ దేవగణ్‌, సైఫ్‌ అలీఖాన్‌, సంజయ్‌ దత్‌ డిస్నీ హాట్‌స్టార్‌ ద్వారా ఓటీటీలోకి అడుగుపెట్టనున్నారు. వారిలాగే షారుక్‌ సైతం ఓటీటీలో అభిమానులను అలరించేందుకు సిద్ధమయ్యారట.
అయితే షారుఖ్‌ ఓటీటీలో కనిపిస్తారన్న సమాచారం అందినప్పటికీ.. అది వెబ్‌సిరీస్ లేదా పూర్తిస్థాయి చిత్రామా అన్నది తెలియాల్సి ఉంది. ప్రస్తుతం ఆయన అట్లీ దర్శకత్వంలో ఓ చిత్రం చేస్తున్నారు. దక్షిణాది తార నయనతార ఇందులో హీరోయిన్‌గా నటిస్తోంది. ఇక దీపిక పదుకొణెతో కలిసి నటించిన పఠాన్‌ విడుదలకు సిద్ధంగా ఉంది.