GullyRowdy: ‘గల్లీరౌడీ’ని పరిచయం చేసిన స్టేట్‌రౌడీ

మెగాస్టార్‌ చేతుల మీదుగా ట్రైలర్‌ విడుదల

హైదరాబాద్‌: కథానాయకుడు సందీప్‌ కిషన్‌ ప్రధానపాత్రలో నటించిన ‘గల్లీరౌడీ’ ట్రైలర్‌ను అగ్రకథానాయకుడు, మెగాస్టార్‌ చిరంజీవి విడుదల చేశారు. యూత్‌ఫుల్‌ లవ్‌స్టోరీతోపాటు ఫుల్‌టైమ్‌ కామెడీ ఎంటర్‌టైనర్‌గా తెరకెక్కిన ఈ సినిమా సెప్టెంబర్‌ 17న ప్రేక్షకుల ముందుకు రానుంది. ఈ నేపథ్యంలో ఆదివారం సాయంత్రం ‘గల్లీరౌడీ’ ట్రైలర్‌ను చిరంజీవి చేతుల మీదుగా చిత్రబృందం విడుదల చేసింది. ఇందులో సందీప్‌ కిషన్‌ విభిన్నమైన పాత్ర పోషించారు. విశాఖపట్నంలో ‘గల్లీరౌడీ’గా ఆయన కనిపించనున్నారు. సందీప్‌ డైలాగులు, కామెడీ టైమింగ్‌, బాబీ సింహా యాక్షన్‌ ఆకట్టుకునేలా ఉన్నాయి.

‘తెనాలి రామకృష్ణ బీఏబీఎల్‌’ తర్వాత సందీప్‌ కిషన్‌-జి.నాగేశ్వరరెడ్డి కాంబినేషన్‌లో వస్తోన్న రెండో చిత్రమిది. ఇందులో సందీప్‌కు జోడీగా నేహాశెట్టి సందడి చేశారు. బాబీ సింహా ప్రతినాయకుడు. కోన ఫిల్మ్‌ కార్పొరేషన్‌, ఎంవీవీ సినిమాస్‌ సంయుక్తంగా ఈ చిత్రాన్ని నిర్మించాయి. కోన వెంకట్‌, ఎంవీవీ సత్యనారాయణ నిర్మాతలుగా వ్యవహరిస్తున్నారు. రామ్‌ మిరియాల, సాయికార్తిక్‌ స్వరాలు అందిస్తున్నారు.