ఎమ్మెల్యేపై అన్నాడీఎంకే బహిష్కరణ వేటు 

చెన్నై: ఎన్నికల వేళ తమిళనాడులోని అధికార అన్నాడీఎంకే పార్టీ ఓ సిట్టింగ్‌ ఎమ్మెల్యేపై వేటు వేసింది. పార్టీ వ్యతిరేక కార్యకలాపాలకు పాల్పడ్డారంటూ ఎమ్మెల్యే సి.చంద్రశేఖరన్‌ను పార్టీ నుంచి బహిష్కరిస్తున్నట్టు వెల్లడించింది. ఈసారి తనకు అవకాశం ఇవ్వకుండా వేరే వ్యక్తికి పార్టీ టిక్కెట్‌ ఇవ్వడంతో చంద్రశేఖరన్‌ స్వతంత్ర అభ్యర్థిగా బరిలో దిగారు. అంతేకాకుండా పార్టీ తరఫున నామినేషన్‌ వేసిన వ్యక్తిని ఓడిస్తానని ప్రకటించడంతో ఆయన్ను పార్టీ నుంచి బహిష్కరించాలని నిర్ణయించినట్టు పార్టీ సమన్వయకర్త పన్నీర్‌ సెల్వం, సీఎం పళనిస్వామి ఓ ప్రకటనలో తెలిపారు. శెంతమంగళం నుంచి సిట్టింగ్‌ ఎమ్మెల్యే చంద్రశేఖరన్‌కు బదులు ఈసారి ఎస్‌. చంద్రన్‌ అనే వ్యక్తిని అన్నాడీఎంకే బరిలో దించింది. చంద్రశేఖరన్‌ 2016 అసెంబ్లీ ఎన్నికల్లో డీఎంకే అభ్యర్థి పొన్నుస్వామిపై 12వేల ఓట్ల మెజార్టీతో విజయం సాధించారు.