Congress: కాంగ్రెస్‌లో చేరేందుకు 20 మంది ఎమ్మెల్యేలు సిద్ధం: జగ్గారెడ్డి

హైదరాబాద్‌: పాలనాపరంగా కాంగ్రెస్‌.. భారాస మధ్య ఎంతో వ్యత్యాసం ఉందని కాంగ్రెస్‌ పార్టీ సీనియర్‌ నేత జగ్గారెడ్డి అన్నారు. భారాస నేతలు ఏనాడూ సచివాలయానికి రాలేదని.. కేవలం వారి ఇళ్ల నుంచే పరిపాలన కొనసాగించారని ఎద్దేవా చేశారు. గాంధీ భవన్‌లో నిర్వహించిన మీడియా సమావేశంలో ఆయన మాట్లాడారు.

‘‘భాజపా ఆదేశాలతోనే ఏపీ సీఎం జగన్‌, భారాస అధినేత కేసీఆర్‌ పనిచేస్తున్నారు. వ్యాపారులను కేసీఆర్‌, కేటీఆర్‌ అయోమయానికి గురి చేస్తున్నారు. ఈ ప్రభుత్వం ఉండదని పారిశ్రామికవేత్తలను భయపెడుతున్నారు. తెలంగాణ అభివృద్ధి చెందొద్దని కేసీఆర్‌, జగన్‌ కుట్రలు చేస్తున్నారు. వారి ఎత్తుగడలను తిప్పికొడతాం. ఎమ్మెల్యేలను నిలబెట్టుకునేందుకు భారాస నేతలు డ్రామాలు ఆడుతున్నారు. 20 మంది ఆ పార్టీ ఎమ్మెల్యేలు కాంగ్రెస్‌లో చేరేందుకు సిద్ధంగా ఉన్నారు. పార్లమెంట్‌ ఎన్నికల్లోపే ఈ 20 మందిని పార్టీలోకి తీసుకుంటాం’’ అని తెలిపారు.