DK Aruna: కేసీఆర్‌కు దమ్ముంటే ఈటలపై పోటీ చేయాలి: డీకే అరుణ సవాల్‌

హైదరాబాద్‌: సీఎం కేసీఆర్‌కు మళ్లీ అవకాశం ఇస్తే తెలంగాణను మింగేస్తారని భాజపా జాతీయ ఉపాధ్యక్షురాలు డీకే అరుణ ఘాటు వ్యాఖ్యలు చేశారు. కేసీఆర్‌కు దమ్ముంటే ఎంఐఎం ఎమ్మెల్యే అక్బరుద్దీన్ ఒవైసీ, భాజపా ఎమ్మెల్యే ఈటల రాజేందర్‌పై పోటీ చేయాలని సవాల్ విసిరారు. బీసీ బిడ్డ గంప గోవర్ధన్‌ను పక్కన పెట్టి కేసీఆర్ పోటీ చేయడం దుర్మార్గమని విమర్శించారు. నాంపల్లిలోని భాజపా రాష్ట్ర కార్యాలయంలో ఆమె మాట్లాడుతూ కేసీఆర్‌పై విమర్శనాస్త్రాలు సంధించారు.

ఓడిపోతాననే భయంతోనే కేసీఆర్ రెండు స్థానాల్లో పోటీ చేస్తున్నారన్నారని డీకే అరుణ విమర్శించారు. రాజకీయాల్లోకి రావాలని ఆశ ఉన్న అధికారులు సీఎం కాళ్లు మొక్కడం సిగ్గుచేటన్నారు. రాజకీయ ఆకాంక్ష ఉంటే పదవులకు రాజీనామా చేసి రాజకీయాల్లోకి రావాలని హితవు పలికారు. కాంగ్రెస్‌-భారాస లోపాయికారి ఒప్పందంతో భాజపాను అడ్డుకోవాలనే పన్నాగం పన్నుతున్నారని డీకే అరుణ ఆరోపించారు. మహిళలకు 33శాతం రిజర్వేషన్లు ఇవ్వాలంటూ పోరాడుతున్న ఎమ్మెల్సీ కవిత.. భారాసలో మహిళలకు 3 శాతం సీట్లే కల్పించడాన్ని ఎందుకు ప్రశ్నించడం లేదని డీకే అరుణ నిలదీశారు.