Ponnam prabhakar: కడియం వ్యాఖ్యలపై ప్రేక్షకపాత్ర ఎందుకు?: మంత్రి పొన్నం

కరీంనగర్‌ పట్టణం, న్యూస్‌టుడే: ‘‘వారం గడవక ముందే కాంగ్రెస్‌ ప్రభుత్వాన్ని కూలుస్తామని ఎమ్మెల్యే కడియం శ్రీహరి అంటున్నారు.. భారాస శాసనసభ్యుడు అవివేకంగా మాట్లాడుతుంటే కేసీఆర్‌, కేటీఆర్‌ ఎందుకు ప్రేక్షకపాత్ర వహిస్తున్నార’’ని రాష్ట్ర రవాణా, బీసీ సంక్షేమ మంత్రి పొన్నం ప్రభాకర్‌ ప్రశ్నించారు. కాంగ్రెస్‌ను ముట్టుకుంటే కాలిపోతారని వ్యాఖ్యానించారు.  బుధవారం కరీంనగర్‌ ఇందిరాచౌక్‌ వద్ద ఏర్పాటుచేసిన సన్మాన సభలో మంత్రి మాట్లాడారు. సీఎం రేవంత్‌రెడ్డి విద్యుత్తు శాఖపై సమీక్ష జరిపితే రూ.85 వేల కోట్లు.. పౌరసరఫరాల శాఖ మంత్రి ఉత్తమ్‌కుమార్‌రెడ్డి సమీక్షిస్తే ఆ శాఖలో రూ.56 వేల కోట్ల బకాయిలు ఉన్నట్లు తేలిందన్నారు. రాష్ట్రంలో అన్ని శాఖల ఆర్థిక పరిస్థితిని సమీక్షించి శ్వేతపత్రం ఇవ్వాలని అధికారులను కోరామన్నారు. అనంతరం జిల్లా కాంగ్రెస్‌ కార్యాలయంలో మంత్రి పార్టీ శ్రేణులతో సమావేశం నిర్వహించారు.ఎమ్మెల్యేలు కవ్వంపల్లి సత్యనారాయణ, మేడిపల్లి సత్యం, నాయకులు పాల్గొన్నారు. మొదటిసారి కరీంనగర్‌కు వచ్చిన మంత్రికి ప్రజలు, పార్టీ కార్యకర్తలు ఘన స్వాగతం పలికారు.