Nara Lokesh: ప్రతి ఎన్నికలకూ నరబలి జరగాల్సిందేనా?: నారా లోకేశ్‌

తెదేపా ప్రధాన కార్యదర్శి లోకేశ్‌

ఈనాడు డిజిటల్‌, అమరావతి: తండ్రి శవంతో పార్టీ ప్రారంభించిన సీఎం జగన్‌, బాబాయి బలితో 2019 ఎన్నికల్లో గెలిచారని తెదేపా ప్రధాన కార్యదర్శి లోకేశ్‌ విమర్శించారు. వైకాపా తుడిచిపెట్టుకుపోవడం ఖాయమైన సమయంలో ఓ మహిళ శవంతో వికృత రాజకీయాలు ప్రారంభించారని మంగళవారం ఎక్స్‌లో మండిపడ్డారు. ‘గీతాంజలి అనే మహిళతో బలవంతంగా అబద్ధాలు చెప్పించారు. బాధితురాలు 7వ తేదీన ప్రమాదానికి గురయ్యారో, ఆత్మహత్యకు పాల్పడ్డారో తెలియదు. తీవ్రంగా గాయపడి నాలుగు రోజులు మృత్యువుతో పోరాడినా ఆమెకు మెరుగైన వైద్యం అందించే ప్రయత్నం చేయలేదు. కనీసం వైకాపా వాళ్లు అటువైపు చూడనేలేదు. చనిపోతే ఆమె శవంతో రాజకీయాలు చేస్తున్నారు. గీతాంజలితో పిల్ల సజ్జల గ్యాంగ్‌ చెప్పించిన అబద్ధాలను ఖండిస్తూ.. తెదేపా అభిమానులు పదో తేదీన ప్రశ్నించారు. బాధితురాలు ఏడో తేదీనే గాయపడ్డారు. ఇవన్నీ చూస్తుంటే బాబాయి గొడ్డలిపోటును గుండెపోటుగా చిత్రీకరించినవారే ఈ మరణాన్ని తమ వికృత రాజకీయాలకు వాడుకుంటున్నట్లు స్పష్టమవుతోంది’ అని మండిపడ్డారు. బలి జాబితాలో ఇంకా ఎందరున్నారో? అని అనుమానం వ్యక్తం చేశారు.