Vijayawada: సీటు ఇవ్వకుంటే పవన్‌కల్యాణ్‌ బొమ్మతో పోటీ చేస్తా: పోతిన మహేష్‌

విజయవాడ (చిట్టినగర్‌), న్యూస్‌టుడే: విజయవాడ పశ్చిమ నియోజకవర్గం సీటు తనకు ఇవ్వకుంటే పవన్‌కల్యాణ్‌ బొమ్మ పెట్టుకుని పోటీచేస్తానని జనసేన పార్టీ నగర అధ్యక్షుడు పోతిన వెంకట మహేష్‌ ప్రకటించారు. ఈ సీటును పొత్తులో భాగంగా భాజపాకు కేటాయించడంలో కుట్ర ఉందని పేర్కొన్నారు. విజయవాడలోని చిట్టినగర్‌లో ఉన్న పార్టీ కార్యాలయం వద్ద శనివారం మహాధర్నా నిర్వహించారు. మహేష్‌ మాట్లాడుతూ.. ‘జనసేన ఆవిర్భావం నుంచి పార్టీని బలోపేతం చేయడానికి కష్టపడ్డాను. అధికారపార్టీ అవినీతిపై పోరాటాలు చేస్తే ఎన్నో కేసులు పెట్టారు. ఇక్కడ జనసేన తరఫున బలంగా ఉండటం వల్లే స్థానిక ఎమ్మెల్యే వెలంపల్లి శ్రీనివాసరావు పక్క నియోజకవర్గానికి పారిపోయారు. నాలాంటి నాయకుడికి టికెట్‌ ఇవ్వకుండా అన్యాయం చేయడం బాధాకరం. అధినేత పవన్‌కల్యాణ్‌ నా సేవలను గుర్తించి పునరాలోచన చేయాలి. లేదంటే ఆయన బొమ్మతో బరిలోకి దిగుతా’ అని స్పష్టం చేశారు.